Stay beside me
Ambot ba, mora man kog gipatay niadtong tungora, naglisod ko pagginhawa. Gikan sa akong nahimutangan nakita ko kaayo si Lorna nga migakos kang Carlo. Klaro nga naghilak siya. Nakita ko nga gihapuhap ni Carlo ang buku-buko ni Lorna. Di na gyud ko mahimong masayop.
Duna gyuy gitagong pagminahalay sila si Lorna ug Carlo.
Nagdali kong mibiya sa among lawn. Giitsa ko na lang gani ang silhig nga gigamit ko sa paglimpiyo sa among lagwerta.
Ug sa sulod sa akong kuwarto, puwerte gyud nakong hilak. Wa na gyud koy paglaom sa akong hilom nga paghigugma kang Carlo.
Wa na ko ganahing migawas sa among balay. Nag-stay at home na lang gyud ko. Gisakitan gyud ko sa akong pagtuo nga nagkahinigugmaay sila si Carlo ug Lorna.
Usa ka hapon nga nagpalabay ko sa oras sa among terrace, nakita ko si Carlo nga diha sab sa ilang terrace. Nagtan-aw siya nako.
Nagdali kong mibiya sa akong nahimutangan. Nakadesisyon ko nga samtang sayo pa patyon ko sa akong kasingkasing ang pagmahal ko kang Carlo. Labaw lang kong sakitan kon magpadayon ko sa paghigugma niya sa hilom nga paagi.
Unya, usa ka buntag nga nagtabyub-tabyog ko sa gilingkoran kong swing sa among lawn, nakalitan ko dihang gisangpit ang akong ngalan. “Carlo!”
“Pasayloa ko, Jeanette, nga misulod nga wa mananghid nimo. Abli man ang inyong gate. Gusto gyud kong makigsulti nimo kay nakamatikod ko nga naglikay ka na nako.”
Gusto kong biyaan si Carlo apan morag nainteres sab ko sa iyang giingon nga gusto siyang makigsulti nako. Nagpabilin kong naglingkod sa swing.
“Unsa man kana, Carlo?” Way kadasig ang akong tingog. Wa gani ko motan-aw kang Carlo.
“Nasuko ka ba nako, Jean?” Gitan-aw kog dugay si Carlo. Seryuso siya. Mikusog pagbutuk-butok ang akong dughan. Gusto kong prangkahan si Carlo.
“Nag-ingon ka nga friends lang mo si Lorna? Wa man ko nimo tug-ani sa tinuod nga duna diay moy hilom nga pagminahalay. Nakita ko si Lorna nga migakos nimo. Naghilak siya. Gihapuhap mo pa gani ang iyang buku-buko. Klaro nga nagmahal ka niya.”
Gitutokan kog dugay ni Carlo. (TAPUSON SUNOD GULA)