LAKERS NABUNGOG SA DUGDOG SA OKC
Midalugdog ang opensa ug hilabi na ang depensa sa Oklahoma City Thunder sa ilang paglampornas sa Los Angeles Lakers, 105-86, kagahapon sa 2019-20 National Basketball Association (NBA) season restart sa Walt Disney World Resort sa Orlando, Florida.
Ang makabungog nga dalugdog sa Thunder gipangulohan ni Chris Paul pinaagi sa iyang 21 puntos, nidugang og 19 puntos si Danilo Gallinari samtang niamot og 18 puntos si Steven Adams.
Ang Thunder, nga karon pa mingdaog batok sa Lakers sulod sa upat ka mga duwa ning maong season, kanunay nga naglabaw ning sangkaa gikan sa sinugdanan hangtod sa katapusang gutlo.
Ang Thunder ningsaka sa 42-25 nga rekord nga nagpahiluna kanila sa kasamtangang ikalima nga dapit sa Western Conference samtang ang Lakers, nga ningsakmit nang daan sa No.1 seed sa West, nahagsa sa 51-16 nga baraha.
Ang 86 puntos nga natali sa Lakers maoy labing ubos nila ning maong season ug mao sab kini ang labing ubos nga nakuha sa usa ka kaatbang sa Thunder.
“We just tried to stick to the game plan,” matod ni Paul.
“We tried to keep those guys off the (free throw) line as much as possible. We tried to build a wall up on LeBron when he’s pushing it. Just trying to make it hard for them.”
Gumikan sa hugot nga depensa sa Thunder, wala’y bisan usa sa mga sakop sa Lakers ang nakaabot g 20 puntos.
Si James igo lang nakamugna og 19 puntos samtang ang usa sa labing sinaligan sa Lakers nga si Anthony Davis igo lang nitampo og siyam ka mga puntos.
“I think we had some great possessions,” asoy ni James. “I think sometimes we have some bad shot selection throughout the course of these games, but I think we got some great looks. Our defense is pretty good. We only allowed the Thunder to shoot 43% from the field. We’ll get our rhythm and start making some.”
Nagsalimoang ang Lakers sa kinatibuk-ang duwa hilabi na sa ilang opensa diin igo lang silang mirehistro og 35% shooting ug 5-of-37 sa threepoint area.
“We’re building habits, and every time we’re out there we have a chance to build and find rhythms,” matod ni Lakers coach Frank Vogel. “These games are still really important for us to do that.”
Sa laing mga duwa, ningdaog ang Utah Jazz batok sa Memphis Grizzlies, 124, 115, Philadelphia 76ers batok Washington Wizards, 107-98, Denver Nuggets batok San Antonio Spurs, 132-126, Toronto Raptors batok Orlando Magic, 109-99, ug Boston Celtics batok Brooklyn Nets, 149-115.