5K NA MIDAWAT SA IKADUHANG HUGNA SA SAP
Gisugdan na sa Department of Social Welfare and Development (DSWD) 7 ug sa nagkadaiyang Financial Service Providers (FSLs) ang pagpanghatag sa ikaduhang hugna sa social amelioration program ngadto sa mga lungsod ug dakbayan nga wala malakip sa geographically isolated and disadvantaged areas (GIDA).
Aduna’y upat ka mga FSL nga regulated sa Bangko Sentral ng Pilipinas (BSP), ang partner sa DSWD 7 alang sa pagpahatag sa SAP sa Central Visayas. Naglakip kini sa Starpay, RCBC, PayMaya ug Unionbank.
Gipili ang maong FSPs pinaagi sa tabang sa BSP diin kadtong mga financial institutions nga aduna’y digital payments aron malikayan kining makuha ang virus sa Covid-19 sa pagpanghatag niini susama sa 1st tranche niini.
Ang mga lungsod sa Madridejos ug Carmen sa lalawigan sa Sugbo, ang una nga nakadawat sa maong emergency cash subsidy.
Gipaagi kini sa RCBC kauban ang cash-out partner center niini nga Gemmary Pawnshop.
Niadtong Agusto 6, naka-payout na sila og 2,213 ka pamilya sa Madridejos ug 2,434 ka pamilya sa Carmen alang sa 2nd tranche.
Laing FSP nga Starpay, ang kasamtangan usab nga nihimo sa payout inubanan sa cash-out partners niini nga M Lhuillier, Cebuana Lhuillier Pawnshop and Gemmary Pawnshop alang sa mga lungsod sa Santa Fe, Borbon, Daanbantayan, Tudela ug San Remigio.
Alang sa mga benepisyaryo sa dakbayan sa Sugbo, ang PayMaya mao ang FSP partner niini.
Gihangyo kadtong mga benepisyaryo nga mo-download sa PayMaya app nga pwede sa parehong android ug iOS.
Kinahanglan nga i-register kadtong mga numero nga gibutang sa social amelioration card (SAC).
Human sa rehistrasyon, i-click sa SAP beneficiaries ang DSWD banner sa home screen ug tubagon ang DSWD Verification form.
Kinahanglan usab nga pareho ang impormasyon nga gibutang sa beneficiary sa SAC.
Makadawat og confirmation text ang SAP beneficiary o kining SAP grant voucher.
Mamahimong mabayad ang maong ayuda pangbayad sa kuryente, mobile load, ug groceries.
Pwede usab kini ma-cash out pinaagi sa Smart Padala agents.