GOMEZ PORMAL MIDAWAT SA HOUSING UNITS SA NHA
Ormoc City - Gitugyan na sa National Housing Authority (NHA) ngadto sa lokal nga kagamhanan sa dakbayan sa Ormoc ang liboan ka housing units alang sa mga biktima sa bagyong Yolanda.
Kagahapon sa buntag, Agusto 9, gipahigayon ang turnover ceremony sa Multi Purpose Hall sa Ormoc City Hall diin gitambungan kini sa kadagkoan sa NHA ug mga opisyal sa dakbayan. Nihatag usab sa iyang virtual message si Secretary Karlo Nograles, chairman sa Task Force Yolanda ug Cong. Lucy Torres - Gomez.
Nikabat og 1,419 ka housing units ang gitukod sa NHA nga nahimutang sa Barangay Margen nga gitawag og Bagong Pag-asa subdivision.
Duna kini sukod nga 40 square meter, conventional bongalow row house type, dunay 10 meter wide to 6.5 meter concrete road ug 3 meter wide concrete pathwalks.
Dunay tabon ang mga kanal, water distribution ug electrical power lines.
Duna usab open space nga gigahin aron himuon nga parking area, park ug playground, health center, eskwelahan, talipapa ug uban pa. Matod ni Nograles, nga bisan sa hulga sa Covid-19 apan padayun gihapon ang trabaho sa gobyerno ug paghatud sa mga proyekto.
Dugang niya nga ning panahon sa Covid-19, nakita ang importansya nga dapat dunay panimalay ang katawhan.
“Sa mga biktima sa Yolanda, kahibawo ko nga taas taas gyod inyong pasensya but atleast niabot gihapon kining atong mga panimalay,” matod ni Nograles.
Nagpasalamat usab si Mayor Richard Gomez sa NHA sa maong proyekto ug nanghinaot nga daghan pa nga housing projects ang ibutang sa Ormoc aron mahatagan og pagtagad ang problema sa illegal settlers.
Matod sa Mayor, naninguha karon ang kagamhanan nga makakita pa og mga yuta nga posibleng kabutangan sa housing units.
Gawas sa Margen, duna usab housing projects ang NHA sa Barangay Gaas ug Dolores. Ang sa Dolores wala pa ma turnover kay mao karon ang gihimo nga isolation facility sa Covid-19.
Nasayran nga taudtaod nang nahuman apan bag-o lang gi-turnover sa lokal nga kagamhanan ug ang uban wala pormal nga gitunol gikan sa NHA.