Stick para social distancing
Nisagop ang awtoridad sa Dakbayan sa Talisay sa paggamit og stick aron pagsukod sa gilay-on nga usa ka metro sa ilang hugot nga pagpatuman sa social distancing.
Matod ni Police Lieutenant Colonel Gerard Ace Pelare, hepe sa Talisay City Police Station, ang ilang paggamit og stick sa iyang mga sakop usa sa labing importante nga butang ilabi sa pagpatuman sa health protocol.
“This is in compliance with the directive. One of our experiences, maglisod ta sa pagpatuman sa social distancing ngadto na sa mga tawo,” matod ni Pelare. Dugang niya nga niining nagkaduol na ang pagsugat sa bag-ong tuig, dili malikayan nga mag dasok ang mga tawo sa nagkadaiya nga mga establisimento aron makapalit sa ilang mga rekados alang sa salosalo sa bag-ong tuig.
“The main purpose is to measure the distance between the two persons,” matod niya. Gihimo sa kapulisan sa Talisay ang paggamit sa stick aron malikayan ang pagkatap sa kagaw sa laing indibidwal.
Samtang gipasabot ni Pelare nga usa pud kini sa mga pamaagi sa pagpangandam ilabi na nga dunay lain na usab nga virus strain ang nadiskubrehan hinungdan nga mas labing epektibo ang mapugngan na daan ang laing pagsuway.
Dunay awhag si Pelare ngadto na sa mga magtiayon ug manag-uyab nga samtang anaa pa ang pandemiya, likayan una ang pag sikitsikit sa publiko ug mosunod lang una sa usa ka metro nga gilay-on kon mag uban man gani.
Matod ni Pelare nga wala may problema kon magduol apan ipatunan gihapon ang usa ka metro nga distansiya.
Gipasabot ni Pelare nga dili angay mahadlok tungod kay ang PNP anaa kanunay sa paghatag og proteksiyon sa katawhan.