Goodbye, 2020. Welcome, 2021
Inig hagtok sa taknaan karong tungang gabii, ato nang kompletong biyaan ang 2020 ug hangpon ang 2021. Bag-ong tuig, bag-ong hagit ug paglaum. Samtang atong biyaan na ang 2020, apan dili nato makalimtan kining tuiga gumikan sa usa dakong hagit nga atong nasinati nga hangtod karon ato gihapong giatubang. Lisud nato makalimtan ang atong mapait nga kasinatian gumikan kay dako kinig epekto sa atong tagsa-tagsa ka kinabuhi, sa atong nasud, sa tibuok kalibutan labi pa sa ekonomiya.
Lahi ang atong nasinati sa 2020. Samtang beterano na kita sa mga kalamidad nga mihamag sa atong kinabuhi, ma-natural o man-made, apan misungasong ug mibarog gihapon kita. Dinhi nakita kon unsa ka lig-on ang atong baruganan ug paningkamot kay luyo sa tanang mga hagit, mibarog gihapon kita ug nagpadayon sa pagpakabuhi ning madangog nga kalibutan nga puno sa mga tanghaga.
Ang misteryosong coronavirus disease (Covid 19) maoy mihamok sa tibuok kalibutan. Bisan ang mga superpower ug gamhanang mga nasud na-igo ug wala dayon maka-kontrolar sa situwasyon. Maayo pa ang binuhatan sa mga terorista kay masumpo ug makontrolar, kining maong balatian way nakapugong. Ug gani hangtod karon nagpadayon man sa paghamok bisan kon aduna nay vaccine nga nadiskobre ang ubang kanasuran.
Daghan ang mga naapektuhan. Daghan ang mga nawadan og trabaho, mga negusyo nanira ug nahagba ang ekonomiya sa pipila ka mga nasud. Na-usab ang sistema sa atong edukasyon ug bisan ang inadlaw nga panglihok-lihok. Apan kitang mga Pinoy maisugong miatubang ning hagit sa kinabuhi ug karon mihinayhinay na og bangon dala ang paglaum nga mobalik na sa normal ang tanan.
Karong gabii, ato nang hangpon ug gakson ang Bagong Tuig. Unsa man kaha ang nagpaabot kanato sa umaabot nga tuig? Magpadayon ba kaha kining kalbaryo nga atong giatubang o mahatagan og gamay’ng kahayag ang atong pagpakabuhi dinhi sa kalibutan? Ang Labaw’ng Makagagahum ra gyud ang nasayod sa atong kapalaran. Happy New Year sa tanan.