Hagit ni Slaughter

Mihayag na karon ang posibilidad nga mahibalik na sa Barangay Ginebra ang higanting Sugboanon nga si Greg Slaughter.

Sa niaging adlaw, ang seven-footer nga kanhi sentro sa University of the Visayas (UV) Green Lancers miluwat og pamahayag sa mga tigbalita nga nangayog pasaylo sa management sa Ginebra human sa iyang taodtaod nga pagbiya sa team tungod sa giingong pagpangluod.

Wa man gud moatubang si Slaughter sa management aron unta pag-renew sa iyang kontrata human nga gihugonhugon nga i-trade siya ngadto sa North Port bugti ni Christian Standhardinger.

Bisan tuod og ni-expire na ang iyang kontrata, apan aduna gihapoy katungod ang Ginebra sa pagpakig negotiate kaniya. Mahimong i-renew iyang kontrata o i-release ba siya ngadto sa laing team pinaagi sa trade.

Pero ang team governor sa Ginebra nga si Alfrancis Chua, sa dihang gipangutana kalabot sa posibling paghibalik ni Slaughter sa team daw og sa wala kaayo maenganyo.

Gani matod ni Chua nga tungod sa kadaghan niya og trabahon ning buwan sa Pasko, wa kaayo niya mahatagi og pagtagad ang kalabot ni Slaughter.

Dugang niya nga wa pa gyud siyay panahon nga makig istorya ni Slaughter ug iyang gipasumbingay nga atleast nasayod kini nga dakong sayop ang gibuhat niini.

Hinuon, wa isalikway ni Chua nga posibling personal kini nga makig-istorya ni Slaughter sa liwas sa bag-ong tuig.

Di nato ikalimod nga si Chua maoy usa usab sa gibasol kon nganong wa maka renew si Slaughter sa Ginebra. Dunay nanggawas nga mga taho nga kompiyansa ra kaayo si Chua sa pagpa renew sa kontrata ni Slaughter hangtod nga migimaw ang hugonhugon nga plano diay sa team nga kini i-trade.

Sa pagkatinuod lang dako ang akong pagtuo nga mahibalik gyud si Slaughter sa Ginebra, pero wa usab nako isalikway ang posibilidad nga i-trade ra gihapon kini ngadto sa laing team ilabi na og maobserbahan nga dili gihapon kini makapakita og saktong labok.

Pipila na ka higayon nga ang Ginebra na champion nga wala si Slaughter so buot ipasabot nga kaya nilang buhian si Slaughter anytime ngadto ni bisan kinsa.

Ug mao na usab kini ang tukmang higayon nga ipamatuod usab ni Slaughter ang iyang kapabilidad sa pag-agak og laing team.

Mas makaayo kaniya kon adto siya sa team nga nagkinahanglan sa iyang serbisyo ug tabang kay sa team nga wa na kinahanglana ang iyang presensiya. Kini maoy dakong hagit ni Slaughter.