Mayor: no left turn sa Mingla ‘epektibo’

Ipadayon sa kagamhanan sa lungsod sa Minglanilla ang pagpatuman sa bag-ong traffic scheme nga “no left turn, right turn only” nga gisugdan pagpatuman sa Enero 14, 2021.

Kini maoy gipahibawo ni Minglanilla Mayor Elanito Peña sa mga tigbalita.

“Ipadayon lang kay murag ni effective man gyud og gamay siya. Pero ako pa gyud ni obserbahan ang sitwasyon,” matod ni Peña. Bisan pa man sa bag-ong paagi, gibutyag sa mayor nga wa pa siya makadawat og reklamo gikan sa iyang mga konstituente.

“Wala pa. okay raman siguro, murag niangay raman sila kay ilang pung pa naa gyuy nausab sa sitwasyon,” dugang sa mayor.

Ang lungsod sa Minglanilla usa sa mga lugar sa habagatan sa Sugbo diin masinati ang huot nga sitwasyon sa trapiko. Hinungdan nga gi-solusyonan kini sa pagpatuman sa “no left turn, right turn only” policy nga nahiusahan sa mayor ug ni Gobernador Gwendolyn Garcia.

Nanghinaot si Peña nga pinaagi sa kooperasyon ug pagsunod sa mga motorista, mahimong hapsay og mamenosan ang huot nga sitwasyon sa trapiko sa lugar.

OKAY SA TALISAY

Si Jonathan Tumulak, pangu sa City of Talisay Traffic Operations and Development Authority (CT-TODA), niingon nga dako og tabang alang kanila ang no left turn policy sa lungsod sa Minglanilla

Matod ni Tumulak nga ang tanang sakyanan nga nagsubay sa dan N. Bacalso Avenue sa Siyudad sa Talisay paingon sa Lungsod sa Minglanilla nga moagi alas 5 hangtod na alas 5:30 sa hapon maghuot pag-abot na sa junction sa Cebu South Coastal Road.

Apan sugod sa pagpatuman sa no left turn, dako kini og tabang tungod kay lahos-lahos na ang mga sakyanan.

/ FILE ■ MILUAG? Mao unta kini ang kahimtang sa trapiko sa N. Bacalso Avenue sa habig sa Talisay ug Minglanilla. Apan sukad gipatuman ang “no left turn, right turn only” policy sa Minglanilla, miluag na ang trapiko, matod sa traffic authorities sa duha ka mga local government unit (LGU).