Kon ikaw kabus

Gipahawanan na sab sa Department of the Interior and Local Government (DILG) ang mga sidewalk gikan sa mga babag. Una nang nangaigo ang mga sidewalk vendor sa miaging hinawanay. Ang ilang panginabuhi naa lang sa karsada. Sila ang gisaligan sa ilang tagsa ka pamilya. Ang uban kanila dunay gipaeskwela nga nakaundang kay wa nay ikabayad sa matrikula ug mabawon kada adlaw.

Ang nakapahimangod ug nakapait kay ang kagamhanan dali-daling nipatuman sa clearing operation nga way klarong alternatibong kapanginabuhian, bisan man lang klarong mabalhinan nga di maapeke ang ilang panginabuhi.

Samtang mao ni ang pagtratar sa kagamhanan sa yano ug kabus nga mga vendor, wa sila makatandog sa mga tag-iya og balay nga adunahan. Ang mga balay naa sa mga luna nga lagbasan sa mga road-widening project sa kagamhanan.

Lapas na sa kapin sa usa ka dekada nga dunay road widening, sama sa Barangay Talamban padulong sa Barangay Pit-os, Dakbayan sa Sugbo, pat-ak pat-ak ang pagpalapad sa dan kay dunay mga bahin nga wa matarog ang mga tag-iya.

Tungod niini, kinabag-an sa populasyon, mga sumasakay ug motorista, nag-antos sa kahuot sa trapiko kay naglisod ang kagamhanan sa pagpiog tungod sa ilang impluwensya.

Mao sab gani ni ang nahitabo sa agianan sa Bus Rapid Transit nga hapit na mag usa ka dekada, apan bisan anino wala kay naa gihapoy problema sa road-right-of-way.

Dinhi makita ang kalainan sa pagtratar sa kagamhanan sa mga kabos nga mahimo rang malubag bisan unsa nga oras kay way ikagasto. Ang kita kutob ra gyud sagad sa baba. Kon adunahan, dunay impluwensya ug dunay ikasukol og kaso, piyungan sa kagamhanan ang tanan.

Human mahinginli sa kagamhanan gikan sa sidewalk, tibway ang ilang panginabuhi, gipun-an pa sa coronavirus disease (Covid-19), nakulban na, gigiak-giakan pa. Kay kabos lagi.