Cebu Pink Paddlers’ virtual ultramarathon sa Marso
Mopahigayon og usa ka virtual ultramarathon ang Cebu Pink Paddlers Dragon Boat Team isip usa ka fund-raising activity alang sa mga breast cancer survivor ug para sa 2022 IBCPC Dragon Boat Festival sa New Zealand.
Ang maong ultramarathon giulohan og Cebu Pink 50K Virtual Ultramarathon nga ipahigayon karong Marso.
Ang tanang partisipante hatagan og saktong panahon gikan sa Marso 15 ngadto sa 31 aron makompleto ang 50 kilometros nga distansiya.
Tungod sa hulga sa pandemiya, gipili sa organizers nga buhaton ang maong dagan pinaagi sa gitawag nga “new normal” sa paugnat sa kusog.
I-record sa participants ang iyang distansiya nga nadagan hangtod makompleto ang 50K.
Ang mga miyembro sa maong dragonboat team kasagaran mga breast cancer survivors maong gusto nila nga palapdan pa ang awareness niini aron malikayan o ma-detect og sayo ang breast cancer.
Kon ma-detect og sayo ang breast cancer mas dako ang survival rate sa pasyente.
Ang registration fee sa maong ultramarathon anaa sa P1,200 aduna na kini lakip nga finishers’ jersey, tube mask ug 4-inch medal made of brass.
Nanghinaot ang organizers nga makadani sila’g 500 ka mga partisipante aron makab-ot nila ang ilang target nga funds alang sa ilang duha ka umaabot nga mga proyekto.
Ang tipik sa proceeds sa maong dagan gamiton alang sa breast cancer survivors. Plano sa team nga maghimo og lain nga free mammogram test human sila mibuhat niini niadtong Oktobre sa miaging tuig.
Matod ni Christian Ian Sy, ang technical race director sa ultramarathon ug mao usab ang head coach sa Pink Paddlers Team, gusto gyud nila nga makasalmot sa maong festival mao nga sayo pa nag-gather na sila’g funds.
Alang sa dugang mga impormasyon, puwede mo-contact nila race managers Lulu Valiente (09228047283), Brenda Purtugalisa (09456574918), Sy (09323188375) o email sa cebupinkpaddlersdbt17@gmail. com.