BIG 3 SA NETS WA MOSALER
Mibalik na’g duwa si Kyrie Irving ug naporma na ang Big 3 sa Brooklyn Nets apan wala gihapon kini mosaler gumikan kay nasugamak gihapon sila sa double overtime nga kapildihan batok sa hosts Cleveland Cavaliers, 147-135, kagahapon sa National Basketball Association (NBA).
Gipangulohan ni Kevin Durant ang Nets pinaagi sa iyang 38 puntos, nidugang si Irving og 37 puntos sa labing una niyang duwa human sa taodtaod nga pahuway samtang nitampo og 21 puntos si James Harden. Apan ang tanang kahago sa labing bag-ong Big 3 sa NBA nawad-an og bili gumikan sa balanseng ataki sa Cavaliers nga gipangulohan sa batan-on nilang lider nga si Collin Sexton. Si Sexton, 22, kinsa gipili sa Cavaliers isip No.8 overall pick sa 2018 rookie draft, nipakatap og iyang career-high nga 42 puntos. Ang three-pointer ni Sexton sa nahabiling 1.2 segundos sa regulation period maoy nakapugos sa premirong overtime unya nipupo kini og 15 puntos sa ikaduhang overtime.
Ang Cavaliers aduna pa’y laing unom ka mga magduduwa nga nakamugna og dobleng numero nga puntos.
Kuyaw sab nga nakaduwa alang sa Cavaliers mao si Cedi Osman, kinsa niamot og 25 puntos alang sa kadaugan samtang nihatag og 17 puntos si Taurean Prince.
Ang Nets nalubong og 13 puntos sa 4th quarter apan nakagukod sila hangtod nga natabla nila ang duwa, 113-113, sa nahabiling 1:10 minutos sa regular period.
Gikan niadto, grabe na kasikit ang kombati ug nakabiya lang og balik ang Cavaliers sa ikaduhang overtime dihang nagbangis og maayo si Sexton.
Giangkon ni Nets coach Steve Nash nga naglibog pa siya kon unsaon siya paggamit ang iyang tulo ka superstars apan malaumon siyang makuha ra niya ang saktong pamaagi sa magsunod nilang mga duwa.
“But I’m not in a hurry. How can we make beautiful basketball together and not worry about the minutiae?”