Kiha ni Osmeña labot sa SRP gibasura

Gibasura sa Regional Trial Court (RTC) Branch 10 ang reklamo nga gipasaka ni kanhi mayor Tomas Osmeña tungod sa giingong ilegal nga pagpamaligya sa yuta sa South Road Properties (SRP).

Ang reklamo ni Osmeña gipasaka batok kang Cebu City Mayor Edgardo Labella, Cebu City Council, SM Prime Holdings Inc., Ayala Land Inc., Cebu Holdings Inc., Filinvest Land Inc., Filinvest Alabang Inc., Cyberzone Properties Inc., Anesy Holdings Corporation, Igold

Holdings Corporation, and Betterfield Phil. Corp.

Ang desisyon nga gilagdaan ni Presiding Judge Soliver Peras wa nitugot sa pagpagawas og writ of preliminary injunction.

Si Osmeña, isip usa ka taxpayer, residente ug kanhi mayor, gikwestyon ang pagkatinuod sa pagbaligya sa yuta sa SRP nga adunay petisyon alang sa declaratory relief nga iyang gipasaka sa korte niadtong Septiyembre 3, 2019.

Ang mga nakiha kay nipasaka nasad sa ilang motion nga mabasura ang petisyon ni Osmeña.

Niadtong Enero 13, 2021, ang RTC nipagawas sa ilang desisyon sa pagbasura sa petisyon ug pagbalibad sa pagisyu og temporary restraining order (TRO) ug writ of preliminary injunction.

Base sa gipagawas nga desisyon sa korte, way legal nga basehan si Osmeña aron pagkwestyon sa kontrata bisan siya taxpayer o konstituwente o kanhi mayor pa.

Tungod kay wala’y “constitutional issue to justify relaxation of the rules on legal standing and there is no disbursement of public funds involved in the contracts to justify suit as taxpayer.”

Matod sad sa korte, adunay nagbabag nga kaso tungod sa petisyon sa usa ka Romulo Torres nga anaa pa sa Court of Appeals.

Ang RTC midisisyon nga way “cause of action” si Osmeña tungod kay adunay giaprobahan nga resolusyon ang konseho nga nagtugot ni kanhi mayor ug karon bise-mayor Michael Rama nga mopirma sa maong kontrata.

Matod ni City Legal Officer Rey Gealon nga usa kini ka kadaugan sa Dakbayan.