Nalingaw kang Alma, Rosanna, Ara, ug Maui
Nalingaw ko nga nagtan-aw nilang Alma Moreno, Rosanna Roces, Ara Mina, ug Maui Taylor sa trailer sa ilang bag-ong pelikula.
Naila kining upat nga mga sexy o bold star kaniadto, sa trailer nga akong nakita nagpatalbugay sila og tudlo sa usa ka bagong starlet kon unsaon nga mahimong usa ka sikat nga pornstar.
Ilang gibase dinhi ang ilang mga kasinatian niadto sa dihang sikat pa sila sa ilang panahon.
Sa mga linya pa lang sa ilang dayalog dili mahimong dili ka makatawa ug makahinumdom sa ilang mga gipangbuhat kaniadto nga maoy nakapasikat kanila.
Tinuod nga silang upat gidala ang ilang kaugalingong papel isip Alma, Rosanna, Ara, ug Maui.
Mas grabe ug mas mosamot kaalegre ang ilang pelikula kay ang upat nga pinaka-kontrobersyal ug gi-pantasya sa mga kalakin-an kaniadto magtigi og hulma sa usa ka bag-ong artista base sa ilang kaugalingong experyensya ug naagian, mao nga kini pa lang sobrang riot na ang mga eksena.
Ang pelikulang “Pornstar” nga bida silang Alma, Rosanna, Ara, Maui, ug usa ka bag-ong sexy star sa Viva ubos sa direksyon ni Darryl Yap ug hatod kanato sa Viva films.
Sa atong nahibaw-an nag-lock in shooting na sila sa Subic, ang pelikula namugna, nasuwat, nasugdan ug nahuman taliwa sa pandemya, Ay’g Saba!
●●●
Aduna pay laing pelikula ang Viva nga makita na ninyo sa mga piniling sinehan o online ug mga babaye gihapon ang mga bida dinhi.
Kini mao ang “Steal” nilang Nathalie Hart, Ella Cruz, Meg Imperial, ug Jennifer Lee. Base sa trailer nga atong nakita usa ka sexy ug maaksyon nga pelikula kini.
Sa titulo pa lang may giplano nga kawaton nga dyamante ang upat ka babaye, kon unsaon kini nila pagkawat mao nay atong atangan.
Basta buhaton nila ang tanan gamit ang ilang karisma, kaseksi, kamadanihon ug kaanyag para lang mapilde ang ilang mga kontra ug makuha ang kon unsa may ilang gusto.
“Steal” unang higayon nga mag-uban silang Nathalie, Meg, Ella, ug Jennifer sa direksyon ni Bona Fajardo, Ay’g Saba!
●●●
Natubag na gyud inyong mga pangutana ug natapos na gyud ang mga hungihong mahitungod kang Janine Gutierrez.
Karon nga Kapamilya artist na ang dalaga, ang unang Kapuso actress nga mibalhin ug mipirma og kontrata sa ABS-CBN human kini nawagtangan og prangkisa.
Apan padayon gihapon ang mga programa niini sa online ug uban pa, mao nga siguradong may mga bag-ong proyekto usab ang gi-andam para kang Janine Gutierrez nga katapusan natong nakita sa matag hapon nga teleseryeng “Dragon Lady” sa GMA 7.
Sa atong nahibaw-an may buhaton kining teleserye sa Dreamscape Entertainment, mahimo na usab siyang parte sa “ASAP Natin ‘To” ug may buhaton pa kining pelikula sa Star Cinema.
Excited na usab kaayo ang Janine nga makatrabaho ang mga Kapamilya stars, Ay’g Saba!