Crying in the rain

Nasuta ko sa akong kaugalingon nga hilom kong nahigugma kang Andro. Gibati ko kaayo ang pangabubho tungod sa akong nasaksihan. Nagsunod ko kanila ni Andro ug Shierel nga naglakaw sa sidewalk.

Mao pay akong paggawas sa eskuwelahan.

Malipayon ang duha nga nagkuptanay sa ilang mga kamot.

Gibati ko ang kasakit sa akong dughan. Nagkabalik diay ang duha? Karon nga nagkauli sila, nga nagminahalay pag-usab, ug natugkad ko sa pinitik sa akong kasingkasing nga love diay nako si Andro, angay pa ba kong maglaom nga kahatagan og katumanan ang mao kong gugma?

Morag gusto kong mohilak kay nahinumdom na sab ko sa paghatag ko sa akong lawas ngadto kang Andro. Mao diay nga dali ko rang gitugyan niya ang akong pagka babaye kay hilom diay kong nahigugma kaniya?

Misulod sila si Andro ug Shierel sa usa ka fast food. Midiretso ko paglakaw ug wala molingi kanilang duha. Di ko gusto nga madugangan pa ang gibati kong kasakit sa akong dughan. Ingon

diay ani ang mahigugma? Maglagot kong makita ang binuhat nga gihigugma nga nakigkuyog sa laing babaye? Apan may katungod ba kong magselos nga di ko man boyfriend si Andro?

Pag-abot ko sa among balay, milargo kog sulod sa akong kuwarto. Mihilak ko pag-ayo. Nagkuob ko sa akong kama. Giumod ko ang akong nawong sa unlan. Dali rang nabasa ang punda sa unlan sa akong mga luha.

Nakadesisyon ko nga mobalhin og university. Sakitan ko pag-ayo kon makita ko sila si Andro ug Shierel kanunay sa eskuwelahan nga malipayon ug very sweet. Ug anang pagka ugma, giasikaso ko dayon ang pag-transfer ko sa pag-eskuwela sa laing university. Ug anang pagkasunod semana, nagtungha na ko sa laing unibersidad.

Apan kon mag-inusara ko, mahinumdom ug mahunahuna ko si Andro. Di nako kalikayan nga mobatig kasakit sa dughan.

Usa ka buntag ana nga way klase, nagpasinguwan na sab ko sa among lawn. Nagsayaw-sayaw ko samtang sa akong mga mata nanglugmaw ang mga luha. Di ug di gyud ko makalimot kang Andro. (TAPUSON SUNOD GULA)