BAKUNAHAN TANAN SA 2021
TARGET SA OPAV BATOK COVID-19 SA VISAYAS; OFFICES SA DOH, LGUS PASUNDON SA MANUAL PAGBAKUNA
Target sa Office of the Presidential Assistant for the Visayas (Opav) nga mabakunahan batok sa Sars-CoV-2, kagaw nga nagdala sa coronavirus disease 2019 (Covid-19), ang tanang mga lumolupyo sa Visayas ning tuiga.
Mao kini ang gibutyag ni Opav Secretary Michael Lloyd Dino atol sa rollout sa Visayas Covid-19 Vaccination manual sa Miyerkules, Abril 14, 2021 sa Visayas Covid-19 Vaccination Operations Center (VVOC) sa Oakridge Business Center sa Mandaue City.
Apan mahimo lang kini kon gamiton sa mga local government unit (LGU) ang Visayas Covid-19 Vaccination manual.
“Everyone, ang gusto nato, before the end of the year, everyone (in the Visayas) will
be vaccinated already,” matod ni Dino atol sa kalihukan.
Nisaad si Dino nga siya moduso ani aron ang Kabisay-an dunay igong supply sa mga bakuna nga gikinahanglan sa tulo ka mga rehiyon.
Iyang giawhag ang tulo ka regional offices sa DOH-Central, Eastern ug Western Visayas--sa pagduso sa iyang buhatan sa gidaghanon sa mga bakuna nga ilang gikinahanglan matag semana.
Gipahimangnoan ni Dino ang mga LGU nga seguraduhon nga ilang mapatuman ang han-ay ug maayong programa sa pagbakuna aron kini makab-ot gamit ang VVOC vaccination manual.
Ang manual maoy dan alang sa pagpatuman sa community vaccination program sa Sugbo ug Kabisay-an.
Ang manual giandam ni InterAgency Task Force (IATF)-Visayas Chief Implementer Mel Feliciano uban sa pakigtambayayong sa Opav ug Department of Health Region (DOH) 7 Regional Director Jaime Bernadas.
Nakabantay si Dino nga di kaayo maayo ang pagkahan-ay sa sa pagpamakuna sa ubang mga dapit. “We should learn from all of these, and I think we’ve been proactive to preempt potential hurdles, that is why we have the VVOC,” matod ni Dino. Ang VVOC namugna pinaagi sa paninguha sa mga stakeholder nga nihatag sa ilang oras, paningkamot, mga kapanguhaan ug kahanas uban sa gipupo nga mga kasayuran, gitun-an pag-ayo nga mga giya nga maoy tamdanan sa mga LGU sa ilang mga programa sa bakuna.
Matod ni Dino nga di ingon niana kasayon ang mass vaccination panahon sa pandemic.
“It has to be nearly perfect, with a clockwork precision. Masterlisting and scheduling are the most important considerations to effectively and successfully do it,” matod ni Dino.