To hold you in my arms

OLIVER PEPITO FLORES (Ikaunom sa pito ka mga gula)

Nahunahuna nako nga di ko magpalupig kang Aileen. Angay kong ipakita kang Rommel nga very sweet ko niya.

Dugay kong gihagkan ang mga ngabil sa akong boyfriend. Nahunong lang ang akong paghawok niya dihang nadungog ko ang kusog nga pakpak sa mga kustomer sa sulod sa fast food nga among nahimutangan ni Rommel.

Mikatawa ko apan namatngonan ko nga namuwa ang akong nawong dihang kami ra si Rommel ang gitan-aw sa kauban namong mga kustomer sa maong kan-anan. Apan nag-smile silang tanan. Dali kong milingkod sa atbang ni Rommel.

“How sweet.”

Nadungog ko ang gisulti sa usa ka kustomer.

Nagpahiyom si Rommel nga nagtan-aw nako. Sus, kaguwapo gyud sa akong boyfriend ug nakita ko na sab ang paborito kong kandiis sa wala niyang aping nga milubyok.

“While mangaon ta, Roxan, isulti nako ang rason kon nganong gusto kang magkita ta karon?”

Wa dayon ko makatingog. Morag nawad-an kog kaisog sa pagpangutana sa akong boyfriend kon unsa katinuod ang gitug-an ni Marissa nako nga naghinapakay sa bukton sila si Aileen ug pulos malipayon ug dagkog mga katawa.

Nabalaka ko nga basig magduda si Rommel nako, sa akong gugma niya, kay makaingon unya siya nga wa koy pagsalig niya.

Napadayag na kini ni Rommel nako dihang nagsultihanay mi sa baybayon nga napunta sa paghatag ko sa akong lawas niya. Basig mahiubos si Rommel nako. Ug mahunahuna gyud niya nga wa koy pagsalig niya.

“Gusto lang tikang makita, ikasulti, ug ikasawo sa lunch, Rom.”

Nausab ang akong hunahuna. Wa ko na siya pangutan-a sa gusto kong mahibaw-an niya. Unsaon man gud ni si Marissa nga manghod sa akong boyfriend nga magsige mag pahibawo nako kon moanha si Aileen sa ila ug makig-estorya kang Rommel?

“Aw, mao sab ko, Rox. Nalipay kaayo ko nga nag-uban ta ron sa pag-lunch. Ganahan kaayo kong mokaon kon ikasawo tika.”

Sus, puwerte nakong lipaya sa akong nadungog. Nagakos ug nahagkan ko na sab si Rommel. Wa ko na tagda ang kauban namong mga kustomer. (TAPUSON SUNOD GULA)