LAKERS KAGING SA WARRIORS
Nagpakatap dayon og triple-double si Stephen Curry sa pagsugod sa National Basketball Association (NBA) 2021-22 season aron pangulohan ang makapakurat nga kadaugan sa Golden State Warriors batok sa hosts Los Angeles Lakers, 121-114, kagahapon, Oktubre 20, 2021 (RP time).
Ang two-time MVP nimugna og 21 puntos, 10 rebounds ug 10 assists alang sa Warriors, nga adunay laing upat ka mga magduduwa nga nakahimo og dobleng numero nga puntos.
Si Jordan Poole niamot og 20 puntos alang sa Warriors, nitunol og 15 puntos matag usa sila si Nemanja Bjelica ug Damion Lee samtang nihatag og 12 puntos ang beteranong si Andre Iguodala.
Sa panagkumboya sa mga nangahisgutan, nasugakod sa Warriors ang kabangis nga gipakita sa duha ka mga lider sa Lakers nga sila si 4-time MVP LeBron James ug Anthony Davis.
Gipangulohan ni James ang Lakers pinaagi sa iyang 34 puntos ug 11 rebounds samtang nidugang og 33 puntos ug 11 sab ka rebounds si Davis.
Ang nakaapan lang alang sa Lakers, wala sila’y laing mga sakop nga nakatampo og dobleng numero nga puntos.
Ang bag-ong mga haligi sa Lakers nga sila si Carmelo Anthony ug Russell Westbrook wala makaarte og insakto. Si Anthony nimugna og siyam ka mga puntos samtang nihatag og walo ka mga puntos si Westbrook.
BUCKS 127, NETS 104
Sa laing duwa, nagbangis dayon ang defending champions Milwaukee Bucks ug ilahang gipanglampornas ang usa sa sayong mga inilog nga mao ang Brooklyn Nets.
Sama sa naandan, gipangulohan na sab ni Giannis Antetokounmpo ang Bucks pinaagi sa iyang 32 puntos ug 14 rebounds. “We’re part of history,” batbat ni Antetokounmpo. “I’m excited. But now it’s over with. We’ve got to focus on building good habits, keep moving forward and keep playing good basketball and hopefully we can repeat this again this year, next year and all the years that we’re going to be here down the road.”
Ningdugang og 20 puntos matag usa sila si Khris Middleton ug Pat Connaughton alang sa Bucks.
Ang Nets gipangulohan ni Kevin Durant pinaagi sa iyang 32 puntos ug 11 rebounds, niamot og 21 puntos si Patty Mills samtang nitunol og 20 puntos si James Harden.