Mistook for love
Nindot kaayo siyag pinahiyoman. Bisan layo ko niya, ang iyang smile morag nagpangamay nako. Ang iyang bugnaw nga tingog kanang mag-estorya mi, ug ang lingin ug gamay GXOD URQLH niyang mga mata, nakapangandoy nako nga ako siyang magakos ug mahagkan.
“You know, Karell, first time kong nahigugma. Karon pa gyud nako ni batia.”
“Siyaro na man sab, Rodney. Anang imong kaguwapo ug ka-macho wa gyud ka kasuway og uyab?”
Naglingkod mi sa seawall sa reclamation area sa among lugar sa San Isidro. Bakasyonista si Rodney sa among lungsod. Ang iyang amahan igsuon sa tag-iya sa balay nga iyang giabtan sa among lugar. Sulagma lang ang among panagkaila. Namalit kog isda nga sudanon sa merkado, ug diha sab diay siya, namili og isda.
“Lab-as kaha ni, Miss?” Nakatan-aw ko sa lalaki nga diha sa akong tupad. Di siya pamilyar nako.
“Di man gud ko anad sa pagtan-aw sa isda, Miss. Gusto ko lang palitan sila si Tiyo ug Tiya.”
Ug mao kadto ang sinugdanan nga nagkaila mi si Rodney. Mihunong diay siyag usa ka semester sa pag-eskuwela kay nagkasakit siya. Ug maong mianhi siya sa probinsiya aron makahanggap kanunay og preskong hangin ug makakaon og preskong mga utanon. Taga siyudad siya.
Ang merkado duol ra sa seawall. Ug kanunay na ming magkita si Rodney dinhi sa seawall every weekend kay mao man nang higayona nga mopauli ko sa among lugar. Nag-eskuwela ko sa siyudad, third year college na ko. Nagpuyo kog boarding house sa siyudad.
Naghatagay man gani mig number si Rodney sa selpon. Sulod sa usa ka buwan sa among panagkaila, nagkasuod gyud mi. Hangtod nga iya kong gipangulitawhan.
“Kining, Rod, di pa man ko mosulod anang butanga. Nag-eskuwela pa man ko.”
“Di man makabalda sa imong study kon sugton ko nimo, Karell. Promise, di tika samuk-samukon sa imong pag-eskuwela. Mag-estorya lang ta sa personal, o kaha sa selpon kon di ka busy sa imong pagtuon.”
Seryuso gyud si Rodney nako. Mituo ko niya nga wa pa gyud siya makasuway sa pagpakig-girlfriend.
(SUMPAYAN)