Dugang tahas ni Rama

Garbo sa dakbayan sa Sugbo nga si Mayor Michael ‘Mike’ Rama napili nga bag-ong presidente sa League of Cities of the Philippines (LCP) niadtong Huwebes, Hulyo 21, 2022, atol sa general assembly sa LCP nga gipahigayon sa Crowne Plaza Manila Galleria Hotel sa dakbayan sa Quezon.

Nidaug si Rama pinaagi sa consensus sa mayoriya. Ang 96 sa 110 ka mga mayor sa dakbayan lukop nasod ang ningpirma sa pagtuboy kang Rama isip pangulo sa liga hinungdang wala na gihimo ang botohan. Gikataho nga subay sa talaan sa 2019, ang liga dunay 146 ka mga miyembro apan wala ningtunga ang uban sa ilang ulahing asembliya.

Samtang, dili basta-basta nga mahimong pangulo sa liga. Gawas nga gilangkobnan kini sa mga bug-at nga politiko, natukod kini subay sa nalatid sa Section 499 sa Local Government Code of the Philippines, “...primary purpose of ventilating, articulating, and crystallizing issues affecting city government administration.”

Dugang pa, nahimugso ang LCP niadtong Hulyo 25, 1987, pinaagi sa executive order ni anhing Presidente Corazon Aquino.

Apan makita nga si Rama wala mobati og kabalaka sa dugang tahas sa LCP ug isip lider sa ikaduha nga labing dako nga dakbayan sa nasod. Daghang problema ang angay tutokan. Gikinahanglan ang iyang pagtimon sa paspas nga ekonomikanhong kalamboan sa Sugbo. Di kaha makibhangan ang panahon ni Rama?

Hinuon, misalig kita sa diskarte sa mayor. Dili kini unang higayon nga naghupot siya sa nasudnong kahugpongan. Importante nga suportahan siya sa ling-ong team nga mopasayon sa iyang tahas. Sa iyang pamahayag, si Rama nagpasalamat sa mga mayor ug nanawagan og kahiusahan sa pagsuporta sa national agenda ni Presidente Ferdinand ‘Bongbong’ Marcos Jr. ug Bise Presidente Sara Duterte.

Hinaut nga dili makabalda, apan ang iyang dugang tahas sa pagpangulo sa LCP mahimong bentaha sa dakbayan sa Sugbo ug uban pang dakbayan sa Metro Cebu. Congratulations, Mayor Rama.