PHOENIX GITAKTAK SA KINGS
Hingpit nga giputol sa Brgy. Ginebra Gin Kings ang paglaom sa Phoenix Super LPG Fuel Masters pinaagi sa pagrehistro og 100-93 nga kadaugan sa ilang sangka sa main game niadtong Huwebes sa gabii, Hulyo 21, 2022, sa Philippine Basketball Association (PBA) Philippine Cup sa Smart Araneta Coliseum.
Wala na man tuoy balor alang sa Gin Kings kining maong duwa tungod kay naselyo na man daan ang ilang puwesto, apan gipagawas gihapon nila ang ilang tanang makaya aron makakuha og momentum sa quarter-finals.
Gihuman sa Gin Kings ang ilang tahas sa elimination round bitbit ang 8-3 nga rekord nga magpahiluna kanila sa ikatulo o ikaupat nga dapit.
Sa ilang bahin, ang Fuel Masters nanamilit bawon ang 3-8 nga rekord.
Balanseng ataki ang gihimo sa Gin Kings unya adunay lima sa ilang mga magduduwa ang nakamugna og dobleng numero nga puntos pinangulohan ni Japeth Aguilar, kinsa mirehistro og 17 puntos.
“We always think of every game in the eliminations as our preparation for the playoffs. Today was especially important because it’s the one before we actually go so we wanna be playing at a high level,” pasabot ni Ginebra coach Tim Cone nga napatik sa www.pba.ph.
Ang Fuel Masters gipangulohan ni Jayson Perkins pinaagi sa iyang 17 puntos samtang nihatag og 16 puntos si Sean Anthony.
Sa laing duwa, wala’y kaluoy nga gipanglampornas sa Meralco Bolts ang nagkagidlay nang daan nga Terrafirma Dyip, 105-89.
Ang Bolts nihuman sa ilang tahas sa elimination round dala ang 7-4 nga rekord samtang manamilit ang Dyip nga butlog, 0-12.