Klarong padulngan ni BBM

Sa Lunes, Hulyo 25, mao ang unang State of the Nation Address (SONA) ni Presidente Ferdinand “Bongbong” Marcos Jr. human siya niasumer sa katungdanan niadtong Hunyo 30 sa udto kang kanhi Presidente Rodrigo Duterte.

Seguradong daghan ang mag-atang nga mga lider sa patigayon, diplomats ug uban pa kay mao kini ang higayon nga moladlad si Marcos sa iyang mga polisiya nga maggiya sa iyang administrasyon sa mosunod nga unom ka mga tuig sa pangatungdanan.

Dinhi maladlad ang iyang ekonomikanhon ug langyaw nga polisiya. Unsay iyang buhaton aron makabangon ang nasod sa duha ka tuig nga bati nga epekto sa Covid-19 pandemic nga nakaigo kaayo sa ekonomiya.

Unsay iyang buhaton karon nga naa pa ang hulga sa coronavirus disease 2019 (Covid-19). Mopatuman ba siya og hard lockdown kon mograbe og balik ang pagpanaghan sa mga kaso sama sa gibuhat sa miaging administrasyon?

Ipadayon ba niya ang init ug way pupanaganang drug war nga gilusad ni Duterte sukad niadtong 2016 o magmugna siya og kaugalingong direksyon? Unsay iyang buhaton sa kasungian sa Pilipinas ug China sa West Philippine Sea (WPS)?

Ipadayon ba niya ang mga programa sa Dept. of Education (DepEd) nga nag-abaga og liboan ka scholars?

Kini ug daghan pa ang angay nga klaruhon sa administrasyon karon aron ang mga negusyante ug uban pang mga sektor nga naghuwat sa direksyon sa administrasyon magiyahan. Ang importante kaayo dinhi mao ang ekonomikanhong polisiya kay ning panahuna nga nagtakilid ang nasod, ang dugang mga investment nga maka-generate usab og trabaho gikinahanglan kaayo.

Ang pagbaha sa puhonan inubanan sa mga maayong ekonomikanhong polisiya mao ang hinayhinay nga makapahaw-as sa nasod gikan sa kalisod, labina ning panahon nga hayan moigo ang economic recession.