Limbolinaw nga programa sa Gilas; Reyes giduphan sa SBP

Gibaha man tuod og maayo sa mga kritiko, pero morag haligi sa palasyo si coach Chot Reyes nga wa gyud matarog sa iyang baruganan.

Imbis mosanong sa panawagan nga mokanaog na sa iyang puwesto isip headcoach sa Gilas Pilipinas tungod sa bati nga performance sa team, ang beteranong coach subsob hinuon nga nangita og mga rason sa mga kapakyasan nga naghatag og bati nga imahe sa Pilipinas sa international sports competition.

Ambot og unsay birtod niining coach Chot nga hasta kita diri naglibog kon nganong di gyud ni siya tangtangon sa Samahan ng Basketball sa Pilipinas (SBP), ang organisasyon nga maoy gitahasan sa nasod sa pagdumala sa basketball sa mga international competition.

Sukad nga siya ang mipuli isip head coach ug program director sa Gilas Pilipinas sa sayong bahin ning tuiga, si Reyes subling mipahibawo sa publiko nga ang iyang tahas mao ang pagpreparar sa Gilas Pilipinas alang sa 2023 FIBA World Cup nga ipahigayon dinhi nasod sunod tuig.

Kini maoy rason nga iyang ibalik-balik sa matag higayon nga ang Gilas masugamak sa kapakyasan.

Apan ang di niya matubag ngadto sa mga Filipino fans nga nagsunod sa ilang mga duwa mao ang pangutana kon unsaon niya paghulma og ligong team nga makahatag og saktong kombati sa mga international competitions?

Limitado ang iyang pagpanguha og dekalidad nga mga PBA players tungod kay dunay conflict sa nagpadayon nga conference, ug ang kapakyas sa paggiya sa Gilas, ilabi na sa mga importanting mga duwa.

Samtang ang ubang nasod anaa na sa saktong preparasyon, kita dinhi wa pa ta masayod kon kinsa gyud ang hingpit nga molangkob sa Gilas Pilipinas.

Ang SBP nagkanayon nga ang Pilipinas nagkinahanglan og mga PBA players alang sa World Cup. Kini bisan pa man sa mga amateur players nga nahulma ni kanhi Gilas coach Tab Baldwin apan nabungkag ra usab dayon sa pagpuli ni coach Chot.

Pero kon laraw man gani nga all-pro ang gamiton sa Gilas alang sa World Cup, nganong wala may PBA players sa FIBA Asia Cup nga mao unta ang tukmang higayon nga maumol ang chemistry sa team?

Dili kaha dunay mga team officials nga dili interesado ug uga kaayo ang suporta ngadto kaniya?

Sa dihang gikastigo sa Lebanon ang Pilipinas, si Reyes daling mirason nga sa kapildihan usa ka dakong experience ang nakuha sa batan-ong Gilas.

Experience? Unsa may gamit nianang iyang giingong experience nga sa ultimo hora pulihan ra man kaha gihapon ni sila og mga PBA player kinsa sa pagkakaron mipalabi pa sa ilang tagsa-tagsa ka mother clubs kay sa national team.

Unsa may kapasidad ni coach Chot Reyes nga iyang ikatudlo sa national team alang sa World Cup nga wa man gani siyay nahimo sa Southeast Asian level?

Ang pagkapukan sa Gilas sa mga kamot sa Indonesia sa

SEA Games magpabiling handurawan sulod sa pipila ka dekada. Lab-as pa usab sa atong panumdoman nga ang Gilas team nga gilangkuban sa mga PBA player naglisod sa Thailand sa mao gihapong torneyo.

Kon itandi sa niaging tuig, ang Gilas ubos ni coach Baldwin, nga wa langkubi og mga PBA players yanong mipukan sa Indonesia ug Thailand.

Sa 2014 Asian Games igo milandig sa ikapitong luna ang Pilipinas. Ning maong kompetisyon, nabaniog ang kontrobersiya kalabot sa pagsugo sa iyang mga players pag-itsa sa bola sa ring sa kontra.

Sa 2017 FIBA Asia Cup, ang Pilipinas ikapito ug sa 2019 Fiba Asia World Cup qualifiers gilampormas og kaduha sa Australia ang Gilas lakip na niini ang karambola sa Philippine Arena.

Kon unsa kaha ang mahitabo sa umaabot nga Gilas Pilipinas sa 2023 World Cup ubos ni coach Chot Reyes, kini maoy dakong pangutana.