Delivery vans target sa 8 ka tulis sa Bohol

Dul-an sa P1 milyon nga cash ang nahagdaw sa mga tulisan kansang target mga ahente sa nagkadaiyang delivery van sa Lalawigan sa Bohol.

Walo ka insidente sa pagpanulis ang nahitabo sud lang sa miaging semana sa managlahing dapit sa maong lalawigan.

Dako ang pagtuo nga usa lang ka grupo ang mihimo sa maong mga krimen.

SAGUNSON

Unang hitabo sa Barangay Tugas, Lungsod sa Getafe niadtong Hulyo 19, 2022 sa sayong hapon, diin si Alfer Reblisa, 37, taga Barangay Poblacion, Lungsod sa Lila maoy unang gibiktima.

Ahente sa ilimnong makahubog si Reblisa nga nag-deliver niadtong higayona sa usa ka tindahan sa dihang giduol sa usa ka lalake dungan sa pagtion og armas.

Bag nga adunay sud nga P40,000 nga halin ug mobile phone ang gikuha dayon angkas ang tulisan sa nagpaabot nga motorsiklo.

Sa Hulyo 20, sa mga lungsod sa Carmen ug Duero, miatake ang mga tulisan.

Tulo ka mga ahente sa inila nga ice cream company nga sila si Sherwin Cimeni, 44; Lenlon Idusma, 33; ug Randy Jumawan, 35, ang nakuhaan og P380,000.

NAILHAN

Usa sa tulisan ang nailhan nga si Julius Sendrijas apan wa pa mailhi ang laing kuyog niini, namay-unan si Sendrija sa iyang mga biktima pinaagi sa Rogues' gallery.

Nasundan ang pagpanulis sa tulo ka mga ahente sa kompaniya og ice cream sa maong adlaw didto sa Barangay Madua Sur, Lungsod sa Duero, diin si Romeo Ido, 37, nga ang iyang gibitbit nga kuwarta nga P153,000, ang nadala.

Sa Hulyo 22 sa Lungsod sa Guindulman, Loon ug Baclayon diin kapin sa P70,000 gikan sa babayeng biktima nga si Margarita Luega, 36.

Wa magdugay sa Lungsod sa Loon nakuha ang P80 mil nga halin gikan ni Nelson Pacolares samtang si Eduard Buagas laing biktima, ang nakuhaan og P90 mil upat ka oras lang ang gintang human gitulis si Pacolares.

Sa Hulyo 24, tulo ka mga biktima nga sila si Juan Taray, 45; John Urvin Aton, 26; ug Marvin Palingcod, 26, ang gitulis sa Barangay Aguipo, Mabini og nakuha ang kapin sa P183,000.

Alerto karon ang kapulisan sa Bohol samtang nagpadayon sa ilang follow-up operation aron pag-ila ug pagsikop sa mga suspetsado. /