Banggiitang isnatser nasikop sa buy-bust
Nakuwilyuhan na ang inila nga isnatser sa dalan N. Bacalso Avenue, atbang sa kanhi City Link Terminal sa Dakbayan sa Sugbo.
Nasikop sa mga sakop sa Sawang Calero Police Station si Mark Jimboy Villarino, 18 nga taga Sityo Ibabao, Barangay Mambaling atol sa gihimong buy-bust operation niadtong Hulyo 22 sa gabii sa Barangay Sawang Calero, Dakbayan sa Sugbo.
Nakuha sa dinakpan ang 15 ka pakete sa gituohang shabu nga motimbang sa 10.7 gramos nga mobalor sa P72,760 base sa standard drug price sa Dangerous Drugs Board (DDB)
Matod ni Police Major Eraño Regidor, hepe sa Sawang Police Station, nga sa nag-edad pa og 16 si Jimboy, makadaghan na kining gialarma sa kapulisan sa kasong pagpanglabni sa mga pasahero sa mga publikong sakyanan nga moagi sa N. Bacalso Avenue.
Gikataho nga kalit lang kini nga mawagtang human nga makalabni og alahas, cellphone tungod kay abtik kaayo nga makatago.
Sumala pa ni Regidor nga naapiki na si Villarino sa iyang
illegal nga binuhatan sa maong lugar tungod sa presensya sa mga pulis ug gipanid-an na ang lihok niini hinungdan nga nabalhin sa pagpamaligya og illegal nga drugas. “Bangiitan ni nga snatcher diha sa N. Bacalso, lisud ni namo madakpan kaniadto kay dali kaayo nga makasuot sa mga balay diha agi sa sapa, kapila nana siya maalarma dili gyud madakpan,” matod ni Regidor.
Apan na-monitor sa mga pulis nga ni-level up kini tungod kay wala nay ikasustento sa iyang bisyo nga mao ang paggamit sa illegal nga drugas hinungdan nga namaligya na.
Kalapasan sa Sections 5 ug 11, Article II sa Republic Act 9165 ang giandam nga kaso sa Sawang Calero Police batok ni Villarino.