Gipaabot sa Sona

Si Presidente Ferdinand ‘Bongbong’ Marcos Jr. mihimo sa iyang unang State of the Nation Address (Sona) karon, Hulyo 25, 2022, sa hapon sa Batasang Pambansa sa dakbayan sa Quezon human sa dul-an sa 100 ka adlaw gikan sa pagpanumpa isip pangulo sa nasod, Hunyo 30, 2022.

Isip unang Sona, wala kitay mapaabot nga undanong nabuhat tungod sa kahamubo pa sa panahon sa bag-ong administrasyon, gawas sa reorganisasyon sa mga ahensiya sa kagamhanan. Gipaabot nga mobutyag siya sa iyang plano nga tipik niini iyang gibutyag na sa kampanya sa eleksiyon.

Hinuon, klaro sa pagkakaron mao ang iyang direksiyon sa food security hinungdan nga niasumer siya isip kalihim sa Department of Agriculture (DA) ug ang edukasyon tungod sa pagtudlo kang Bise Presidente Sara Duterte nga mangulo sa Department of Education (DepEd).

Makapaabot kita dunay dakong kausaban sa duha ka mga sektor. Apan kabahin lang kini sa kinatibuk-ang kinabuhi sa pagbarog sa usa ka ligong nasod. Ikaw, unsay buot masayran sa Sona ni Marcos karon? Pwera ubang kontra sa pulitika nga wala pa maka-move on ug ang pipila ka walhong grupo, matagna nang daan ang ilang aksiyon.

Samtang, gawas sa edukasyon ug agrikultura, daghan pang angay madunggan nato sa Sona ni Marcos, sama sa kanunay nga pagtaas sa presyo sa lana, kakabus sa mayoriya, government partnership uban sa private sectors, kampanya batok sa illegal drugs ug kriminalidad, lakip sa infrastructure development, human rights ug uban pa.

Matag usa kanato dunay gustong matutokan ni Marcos. Nagkalainlaing grupo dunay kaugalingong agenda. Dili seguro kini matuki ang tanan sa Sona, busa hatagan nato siya nga makasikad sa pagtimon sa renda sa kagamhanan.

Ang mga lihok-protesta, dili lang tawhanong katungod ug nakalatid sa Batakang Balaud, importante kini sa pagbalanse sa gahom sa nagharing hut-ong. Napamatud-an na nga ang aktibong pagpakabana ug kahiusahan dugokan sa kadaugan ug kalamposan.