Kay tawo lamang

Dear Papa Joe,

Kabalo ko nga sala kini nako tanan. Tawaga lang ko og Eliana, 27 years old ug may uyab.

Nagsugod akong problema tungod sa akong kagahi og ulo. Ang akong uyab kay walay challenge na kay 5 years mura na lang mi og igsuon. Usa ka adlaw niana samtang nag-party ilang pamilya, nag-inom mi, apil iyang igsuon nga lalake.

Sa pagpamauli namo, niingon akong uyab na iyang manghod lang daw iyang pahatdon kay di niya kaya mo-drive kay nasubrahan siya og inom. So, mao to gihatud ko.

Apan sa pag-abot namo sa akong boarding house sa gawas ug sulod sa awto nga tinted, gikalitan ko og hawok sa iyang igsuon ug ambot wa ko kabalibad ug naa gyuy nahitabo namo.

Mao ni akong problema ron kay maglisud na ko og gawas kon mohangyo na ang manghod sa akong uyab. Unsay buhaton ko?

ELIANA

Eliana,

Kon gusto ka makalingkawas, undangon nimo ang duha kay dako nang iskandalo. Dakong gubot na kon masayod imong uyab. Siguradong maguba ang ilang relasyon ug posibli pang maapil ilang mga ginikanan.

Mangita lang gyud ka og laing rason kon nganong mopalayo ka o pwede sad angkunon nimo ang kasaypanan apan mao gihapon pwede maguba ang ilang relasyon.

Siguro mauli ra ilang relasyon puhon apan lisud gyud og magpadayon mo kay di na malimtan ang imong sayop, labi na sa ilang mga ginikanan.

Gawas kon mataymingan ka nga masinabtanon nga bunga lang sa tentasyon ang tanan kay tawo lang ka.

PAPA JOE