Panginabuhi sa kababayen-an sa CV gipalambo pinaagi sa SLP sa DSWD 7
Ang pandemiya nakapasamot sa kalisod, sumala ni Raymunda Basalan, 84, mag-uuma ug namaligya og mga utanon sa merkado sa Bayawan City, Negros Oriental.
Apan, matod ni Basalan, ang P10,000 nga ayuda gikan sa Sustainable Livelihood program (SLP) sa Department of Social Welfare and Development (DSWD) dako og natabang sa pagpahiuli sa ilang kahimtang.
“Ang 10,000 nga nadawat nako maoy akong gipuno sa akong sari-sari store. Ang assistance mao kini ang instrumento tabang sa Ginuo aron kami dili magutman ug mapadayon ang among panginabuhi,” paambit ni Sarah S. Gutierrez, kanhi sa overseas Filikpino worker (OFW) ug usa ka benepisaryo gikan sa dakbayan sa Tagbilaran, lalawigan sa Bohol.
Si Gutierrez nanag-iya og sari-sari store apan panahon sa pandemiya, ang iyang ginansiya lakip sa puhonan magamit sa panginahanglan sa pamilya.
“Dako kaayo ning tabang kanamo, sa among gagmay nga panginabuhi,” matod ni Lourdes, kinsa mapasalamaton sa nadawat gikan sa kagamhanan nga naghatag og suporta sa katawhan.
Ang SLP nidestino og kawani nga regular nga mobisita sa mga benepisaryo ug nag-monitor sa pagpatuman sa Livelihood Assistance Grant (LAG) ug naghatag og technical assistance.
Atol sa monitoring, ang regional program coordinator, Rizalina Patindol, niawhag sa mga benepisaryo sa paghatag og importansiya sa hinabang gikan sa kagamhanan.
“Kinahanglan mag-keep mo og notebook o logbook sa inyong halin, aron dali makita ang earnings or losses ninyo,” matod ni Patindol.
Ang SLP Region 7 nakahatag na og P595 million sa LAG. Ang LAG nagsugod sa 2020 atol sa pagsulbong sa Covid-19.
Sulod sa duha ka tuig, ang programa niatiman sa 57,042 ka pamilya; 11,119 sa Bohol; 31,241 sa Cebu; 12,612 sa Negros Oriental; ug 2,070 in Siquijor.