NANGHAWOD ANG RP TEAM SA 2022 WEKAF

Yanong gilangkat sa Team Philippines ang overall title sa 16th World Eskrima Kali Arnis Federation (WEKAF) Championships nga gipahigayon niadtong Hulyo 18-22, 2022, sa Mandaue City Cultural and Sports Complex.

Gipahimuslan og insakto sa Team Philippines ang ilang

homecourt advantage aron iposte ang labing dominanteng kadaugan sa 33 ka mga tuig nga kasaysayan sa WEKAF.

Hinuon, dili ikalimod nga nakatabang sab sa Pinoy arnisadors aron maposte ang hingpit nga dominasyon ang kamatuoran nga adunay uban nga langyaw nga mga partisipante ang wala nadayon pag-anhi tungod sa problema sa pagbiyahe, kahasol nga hatod sa pandemiya.

Ang Pinoy arnisadors ninghakot og 418 ka mga medalya sa kinatibuk-an nga gibahin sa 141 ka mga gold, 139 ka mga

silver ug 138 ka mga bronze.

Sila si Bryze Danielle Manaytay, Annjeanette Brilliantes, Jude Oliver Marie Rodriquez, Kate Iccy Solis, Anthony Cris Luna, ug Dexler Bolambao mao ang labing kuyaw nga nakakombati alang sa Team Philippines. Nakahakot sila og tulo ka

gold medals matag usa. Grabe ka layo ang distansya sa nagsunod sa Team Philippines nga mao ang Team USA, nga igo lang nakahakot og 21 ka gold, 21 sab ka silver ug 47 ka bronze medals.

Naa sa ikatulo mao ang South Korea nga mitali og 3-39 medal tally.

Sila si Robert Williams, Kim Everett, Mary Rogers, Alex Salinas, Richard Coley, Valentin Stanev, Cooper Geldmacher, Kenneth Roiles ug Doug Elkerson mihatag og tag duha gold

medals sa Team USA.

Si Jinkyu Lee ang mibida sa South Korea pinaagi sa paglabni og duha ka gold medals samtang si Seongun Byeon maoy nikuha sa ikatulo nilang gold.

Ang kompetisyon gisalmutan sab og arnisadors gikan sa United Kingdom, Portugal, Switzerland, Germany, ug Brazil.