Lawas sa lalaki napalgan sa dagat sa Mambaling

Wa pa mailhi sa kapulisan ang usa ka lalaki nga napalgan nga patay nga naglutawlutaw sa dagat luyo sa Santarita Noah (Pan-I), habig sa Barangay Mambaling,siyudad sa Sugbo.

Pasado alas 4 sa Lunes sa kaadlawon, Hulyo 25, 2022, usa ka mamanagat nga si Andy Padica, taga sitio Colveta, Brgy. Mambaling sa siyudad sa Sugbo, nakakita sa lawas samtang namukot og isda sa dapit.

Nipahibawo siya sa sibyaanang dyHP labot sa iyang nakita ug gitawag usab dayon ang kapulisan sa Mambaling Police Station.

Sa ilang pag responde sa alas 5:45 sa buntag, ilang nakita ang lalaki nga nagkulob nga naglutaw sa dagat nga dili na mahulagway tungod kay nagsugod na og kadugta ang lawas.

Ang lalaki nagsul-ob og puti nga t-shirt ug nag shorts og de garter ug adunay tattoo sa iyang tuong bukton nga Diaz.

Matod ni Police Major Bethooven Taneo, hepe sa Mambaling Police, nga nagpadayon pa ang ilang imbestigasyon pag-ila niini.

Dili pa usab sila makabutyag kon gipusil ba ang biktima sanglit dili naman maklaro ang lawas niini tungod kay miburot na.

Aduna silay nakita nga mga samad sa lawas apan dili nila madeterminar kon pinusilan ba o samad ra sa iyang paglutaw sa dagat.

Nagpaabot pa sila sa resulta sa autopsy nga gihimo sa PNP Crime Laboratory 7 aron ilang mahibaw-an kon unsay gikamatyan niini.