22-anyos nga mekaniko patay sa bangga
Giingong pagpasagad og maneho maoy hinungdan sa panagbangga sa duha ka mga sakyanan nga hinungdan sa kamatayon sa usa ka mekaniko sa sakyanan sa lungsod sa Liloan, amihanang Sugbo.
Matod ni Staff Sergeant Dennis Louie Castillo, traffic investigator sa Liloan Traffic Enforcement Unit, nga ang pagpasagad sa pagmaneho maoy hinungdan sa aksidente nga niresulta sa kamatayon sa 22-anyos nga mekaniko sa Barangay Yati, lungsod sa Liloan niadtong Dominggo sa alas 2:30 sa kaadlawon, Hulyo 24, 2022.
Giila ni Castillo ang biktima nga si John Paul Saceda samtang, ang ilang gidakop nga maoy nagmaneho sa motorsiklong gikabangga mao si Louie Anthony Collano Jr., trabahante sa radiator shop.
Ang duha parehong mga residente sa Barangay Yati.
Sa imbestigasyon, matod ni Castillo, nag-overspeeding si Saceda hinungdan nga nihimo og “improper turn” hinungdan nga iyang nabanggaan ang lubot sa motorsiklo ni Collano. Silang duha gikan sa amihanan padung sa habagatan.
Gidala pa sa Mendero Medical Center sa Consolacion si Saceda apan gideklarar nga patay na sa nag-atiman nga doktor.
Si Collano gitanggong sa Liloan police custodial facility.
“As of now amo gi-hold sa police station. Nahulog nga arrested siya pero wala pa namo siya gi filan og kaso kay nag wait pa mi sa desisyon sa parents sa biktima,” matud ni Castillo.
Si John Rey Bohol, Litcom traffic enforcer, nitug-an usab nga dihang niresponde siya sa unang insidente sa aksidente sa motorsiklo, iyang nakita si Saceda nga miagi sa maong dapit.
Matud pa ni Bohol nga iyang gisinggitan si Saceda kay kusog kaayo ang pagpadagan.
“Kusog gyud siya nagpadagan. Paglabay niya akong singgitan og hoy, kusoga ba ka nagpadagan,” asoy ni Bohol
Samtang, gikataho nga ang mga ginikanan ni Collano nisuway og istorya sa nagbangotan nga pamilya sa biktima.
Gusto nila nga mahusay ang duha ka mga habig, apan gipasagdan lang una tungod kay nagbangutan pa ang pamilya sa kamatayon sa biktima.