Liboan nakapahimulos sa libreng eye check-up sa Semi Di Speranza Foundation sa lungsod sa Carmen

Sa ikaduhang higayon, laing liboan ka mga lumolupyo sa Kwatro ug Singko Distrito sa Sugbo ang nakabenepisyo sa libreng serbisyo sama sa check-up sa mata ug libreng eyeglass, lakip ang mga 80 ka mga indibidwal nga nakadawat og tagsa-tagsa ka wheelchairs.

Si Chili Tita Cabatingan, founder sa Semi Di Speranza, nagkanayon nga dul-an sa 5,000 ka mga tawo ang nakabenepisyo sa libreng eyeglasses human sa libreng check-up sa ilang mga mata.

Samtang, niabot usab og 80 ka mga tawo ang nakadawat og wheelchairs atol sa sa duha ka adlaw nga kalihokan niadtong Sabado, Hulyo 23, ug Dominggo, Hulyo 24, sa gym sa Barangay Poblacion, lungsod sa Carmen.

Ang mga tawo nga nagpaabot gilingaw usab sa mga pakulo human nag-apud-apud og tag 5 kilos nga bugas humay.

Ang Semi Di Speranza unang nihimo sa samang serbisyo niadtong Mayo ning tuiga sa San Nicolas Gym sa Barangay San Nicolas, dakbayan sa Sugbo ug ang grupo nagplano sa dugang dapit nga maalagaran.

Usa sa mga mihatag og tabang ngadto sa maong foundation mao si kanhi 2022 senatorial candidate Francis Leo Marcos, kinsa maoy nihatag sa wheelchairs ug eyeglasses.