Sunsport basketball camp mobunyag sa SBTC
Mabunyagan ang bag-ong natukod nga Sunsport Basketball Training Center (SBTC) pinaagi sa usa ka basketball training camp nga pasiugdahan sa Sunsport sa sunod buwan.
Ang SBTC nahimutang sa North Road National Highway eskina sa barangay Basak ug Canduman sa siyudad sa Mandaue.
Ang gitumbok nga basketball training camp modagan og upat ka mga Sabado nga magsugod karong Agusto 6, 2022 ug mahuman karong Agusto 27, 2022. Aduna lay 30 ka slots ang gitagana alang niini.
Ang Sunsport mopahigayon sab og laing basketball training camp nga sugdan karong Agusto 4, 2022 ug ipahigayon kini sa Sacred Heart Center Sports Club sa dalan D. Jakosalem, dakbayan sa Sugbo.
Ang mag-unang 60 nga magparehistro mao lang ang dawaton ning maong training camp, nga ipahigayon matag Martes ug Huwebes. Mahuman kini karong Agusto 30, 2022.