Anti-drug campaign pakusgan sa PDEA; drug clearing program ipa ISO

Direktor sa Philippine Drug Enforcement Agency (PDEA)-7 Levi Ortiz nibutyag nga bisan kon wala maapil sa labing unang State of the Nation Address (Sona) ni Presidente Ferdinand “Bongbong” Marcos ang pakig-away batok ilegal nga drugas, ang ilang buhatan magpabilin sa paghingusog sa kampanya batok niini.

Matud pa ni Ortiz nga mas hingusgan pa nila ang kampanya batok sa illegal drugas ning administrasyon.

“Kami man gud under mi sa Office of the President. Kon unsay order, kon unsay will and pleasure sa Presidente, amo gyud na nga tumanon,” matod ni Ortiz.

Gipahibawo ni Ortiz nga wala nagpasabot nga kumo kay wala naapil sa Sona ni Marcos, maputol na ang kampanya kontra sa ilegal nga drugas, magpadayon hinuon ug mas hingusgan pa.

“Basin naa siya’y plan about ani. Wala pa lang niya i-discuss, pero on the part of Pdea, padayon ang atong pakigbisog,” dugang ni Ortiz.

Samtang gidugang niya nga gawas sa paghingusog sa pagsumpo sa ilegal nga drugas, ila usab nga palig-unon ang barangay drug clearing program.

Si Ortiz uban ni Director General Wilkins Villanueva nagtagbo alang sa plano nga ang Barangay Drug Clearing Program ipa-enroll sa International Standard Organization (ISO).

“Mao na ang among na meetingan kay ang among plano nga ma certify siya sa ISO,”pasabot ni Ortiz.