Digitalisasyon

Nagkalainlain ang reaksiyon sa unang State of the Nation Address (Sona) ni Presidente Ferdinand Marcos, Jr. sa Batasang Pambansa niadtong Lunes sa hapon, Hulyo 25, 2022. Normal kini sama sa Sona sa nangaging presidente. Magdepende sa agenda sa indibiduwal o grupo lakip sa ilang oryentasyon sa pulitika.

Puno sa saad. Nagsamin sa iyang kampanya sa eleksiyon apan gipalapdan sa Sona sa plano sulod sa unom ka tuig nga iyang termino. Nindot ang tuno sa iyang pakigpulong, positibo ug ang pagpadayon sa mga maayong programa ug proyekto sa iyang gisundan nga administrasyon.

Si Marcos niila sa digitalisasyon isip yawe sa kalamboan. Subay niini, nisaad siya nga 30 milyunes nga physical ug 20 milyunes nga digital national identification (ID) cards ang ipagawas ning tuiga. Dugang dul-an sa 92 milyunes ka IDs sa tunga-tunga sa mosunod nga tuig. Gusto niya nga mapatuman sa hingpit ang digital transformation sa nasod.

Pinaagi sa digital IDs, ‘seamless’ o dili moagi og daghang proseso, mas sayon ug paspas ang identity verification. Bisan wala siya mosulti sa Sona bahin sa korapsiyon, ang red tape system diin dugokan sa pangurakot mawala sa digitalisasyon sa tanang transaksiyon.

Bisan sa food security nga prayoridad ni Marcos isip temporaryong nangulo sa Department sa Department (DA), ang digitalisasyon gamit kaayo labina sa paggamit sa labing ulahi nga teknolohiya sa agrikultura. Nagpasabot kini nga malangkubon ang epekto sa digitalisasyon sa tanang mga aspeto sa kinabuhi sa bag-ong henerasyon.

Sakto si Marcos. Apan kon magpadayong kontrolado sa pribadong telecommunication companies (Telcos) ang nag-unang inprastraktura sa connectivity sa world-wide web sa nasod, mosamot pagburot ang ilang bulsa. Ang telcos dako og matabang sa pasiunang digitalisasyon sa nasod, apan ang kagamhanan maayong moangkon sa dakong pahat sa kita para sa tanan.