DURANT GUSTONG KUHAON SA CELTICS
Dihang mihangyo si Kevin Durant og trade gikan sa Brooklyn Nets, wala nahisgutan ang Boston Celtics nga usa sa teams sa National Basketball Association (NBA) nga gustong balhinan sa gitawag og “Durantula.”
Apan kagahapon, ningbaniog sa nagkadaiyang taho sa social media nga ang Celtics na adunay labing dakong purohan nga makakuha kang Durant.
Usa ka tinubdan sa ESPN ang nibutyag nga nitanyag ang Celtics og tapok sa mga magduduwa nga gipangulohan ni Jaylen Brown ug tulo ka umaabot nga draft picks (2025, 2027, ug 2029) aron ibaylo kang Durant.
Giingong mibalibad ang Nets ning maong tanyag sa Celtics. Gusto sa Nets nga ilakip sa tanyag sa Celtics ang kasamtangang Defensive Player of the Year awardee nga si Marcus Smart.
Wala na pangayoa sa Nets ang lider si Jayson Tatum gumikan kay nipabuhagay nang daan ang All-Star forward nga dili kini nila buhian.
Gikataho nga padayon pa ang diskusyon sa Celtics ug Nets.
Kon madayon nga mabalhin si Durant sa Celtics, gituohang mahimo ang team nga labing inilog nga makalabni sa titulo sa sunod season. Sa sayo pa, nipadayag si Durant nga ang gusto niyang balhinan mao ang Miami Heat o ang Phoenix Suns apan nasuta nga kuli kining mahitabo.