SMB, TROPA SEMI-FINALS ANG TINGUHA
Mga duwa karon: 3:00 pm- Talk N’ Text batok Converge 6:00 pm- San Miguel batok Blackwater
Moambak dayon og suway sa semi-finals ang San Miguel Beermen ug Talk N’ Text (TNT) Tropang Giga sa ilang pagpakigbatok og lainlaing kontra karong adlawa, Hulyo 27, 2022, sa Philippine Basketball Association (PBA) Philippine Cup sa Smart Araneta Coliseum sa Manila.
Ang Beermen, nga maoy No. 1 team human sa elimination round, makigharong sa No. 8 Blackwater Bossing sa main game samtang ang Tropang Giga, nga maoy No. 2 squad, makigbatok sa No. 7 Converge FiberXers sa premirong duwa karong alas 3:00 sa hapon.
Isip benepisyo sa ilang pagsulod sa top two, ang Beermen ug Tropang Giga parehong naggunit og twiceto-beat nga bintaha.
Ang Beermen determinado nga mabawi ang ilang gingharian sa All-Filipino conference nga nalumpag dihang naangol ang ilang pambatong sentro nga si Junemar Fajardo sa miaging season.
Karon nga nahimsog na pagbalik ang higanteng produkto sa University of Cebu (UC) Webmasters, madasigon ug masaligon ang Beermen nga malangkat pagbalik ang kampyunato.
Dili ikalimod nga grabe ka inilog ang Beermen apan dili basta-basta moisa sa ilang puting bandera ang Bossing, nga nagtagamtam sa labing maayo nilang performance sukad sa ilang paghiabot sa liga.
“We’re blessed with this opportunity to be in the playoffs. San Miguel is the heavy favorite, but we’ll come out and put up the best fight we can,” asoy ni Blackwater coach Ariel Vanguardia.
Sa ilang sangka sa elimination round niadtong Hulyo 10, 2022, wala damhang ningsubay og malisod nga dalan ang Beermen una nila nahubog ang Bossing, 110-107.
Sama sa Beermen, grabe sab ka inilog ang Tropang Giga batok sa FiberXers apan wala kini nagpasabot nga kuli ang purohan sa FiberXers.
Sa ilang unang panagtagbo, nakapanghudlat og maayo ang FiberXers una sila ningyukbo sa Tropang Giga, 86-83.