4 patay, 60 angol sa linog sa Abra

Upat ang patay samtang 60 ang angol sa magnitude 7 nga linog nga niigo sa lalawigan sa Abra kagahapon sa buntag, Hulyo 27, 2022, sumala ni Department of the Interior and Local Government (DILG) Secretary Benhur Abalos Jr.

Sa iyang taho ngadto kang Presidente Ferdinand “Bongbong” Marcos Jr. atol sa press briefing sa Malacañang, si Abalos nagkanayon nga tulo ang patay gikan sa Benguet ug ang usa gikan sa Abra. Sa mga angol, dason ni Abalos Jr., 44 ang taga Abra.

Dugang niya nga 6,756 ka mga barangay sa Ilocos, Cagayan Valley ug Cordillera ang naapektohan sa linog.

Ang Cordillera region, labina sa Abra, si Abalos Jr. nitaho nga 29 ka municipal roads, 3 ka taytayan ug 173 ka buildings nga pribado ug gipanag-iya sa kagamhanan ang nadaut, lakip sa 173 ka landslides.

Sumala ni Philippine Institute of Volcanology and Seismology Director Renato Solidum, ang linog niigo sa alas 8:43 sa buntag ug shallow o mabaw ang tinubdan, gikan sa 17 kilometros nga gilawmon.

Ang epicenter nahimotang sa tulo ka kilometros northwest sa Tayum, Abra, dason ni Solidum. Si Presidente Ferdinand Marcos Jr. gikatakda nga mobisita sa mga dapit nga naigo sa linog.