Soco: Angay mangandam; LGUs andam mopada og tabang sa Abra

Ang pag-igo sa 7.0 magnitude nga linog sa lalawigan sa Abra sa Cordillera Administrative Region (CAR) magsilbi nga leksiyon nga kinahanglan nga kanunay mangandam.

Kini ang pamahayag ni Provincial Board Member Glenn Anthony Soco, tsirman sa committee on infrastructures sa Hunta sa Lalawigan, ngadto sa mga tigbalita kagahapon, Hulyo 27.

“Kita nga naa karon diri nga wala ma-affected, we have to learn also from the experience didto sa Luzon,” matod ni Soco, kinsa nipadayag sa iyang pagduyog sa mga naapektohan sa linog.

Matod ni Soco, ang mga engineer ug architect kinahanglan nga moseguro sa kalidad sa mga estraktura nga nakasandig kanila.

Si Soco nitumbok sa Palace of Justice Building sa luyo sa Kapitolyo nga wala na gamita hangtod karon.

“Even up to now di gyud na siya magamit kay while it looks nga complete, pero dili na siya safe to be occupied,” matod ni Soco.

RELIEF AID

Ang Department of Social Welfare and Development (DSWD) 7 nipasalig nga dunay standby food ug non-food items sa regional warehouse nga andam ihatod sa apektadong mga dapit sa Luzon.

Si Shalaine Marie Lucero, acting DSWD 7 director, niingon nga ang National Resource Operations Center (NROC) sa DSWD, ang relief production hub sa Pasay City, nagsuporta karon sa local government units sa Luzon nga naapektuhan sa linog.

Ang DSWD kasamtangang dunay tulo ka bodega sa Tagbilaran City sa Bohol, Dumaguete City sa Negros Oriental ug Cebu City.

Sumala sa DSWD 7’s Preparedness for Response Report sa Martes, Hulyo 26, ang rehiyon dunay 24,688 standby family food packs nga mobalor og kapin sa P14 milyunes.

Sa non-food items, ang DSWD 7 kasamtangang dunay 2,385 kahygiene kits, 2,906 kafamily kits, 1,531 kakitchen kits, 5,666 kasleeping kits, 989 kamodular tents, 2,108 ka laminated sacks, 41 kadignity kits, 20 kamats ug 15,062 ka malong alang sa pagkatulog.

Ang DSWD 7 dunay P5 million nga standby funds alang sa large-scale emergency.

TABANG SA LGU

Si Lapu-Lapu City Mayor Junard “Ahong” Chan nimando sa pag-andam sa Collapsed Structure Search & Rescue Team ubos sa Disaster Risk Reduction and Management Office (DRRMO) alang sa pagtabang sa Abra.

Sa iyang social media post, si Chan nakigkoordinar na sa Office of Civil Defense (OCD) 7 bahin sa ilang tabang.

Samtang, si Atty. John Eddu Ibañez, chief of staff ni Mandaue City Mayor Jonas Cortes, nibutyag nga ang mayor nimando sa pag-andam sa Bantay-Mandaue-DRRMO kon kinahanglan sa OCD.