Pasalig sa kontraktor: 3rd, 4th floors sa bag-ong CCMC matapos sa Oktubre

Tanang architectural nga panginahanglan sa third ug fourth floors sa bag-ong Cebu City Medical Center (CCMC) makompleto sa pagtrabaho sa M.E. Sicat Construction sa Oktubre 28, 2022, apan dili na ang ikawalo hangtod sa ika 10 nga andana sa edepisyo.

Kini ang pasalig sa kontraktor nga si Michael Sicat nga nagtrabaho sa phase 4 sa CCMC balor og P917 milyunes.

Siya nipadayag niini ni Mayor Michael Rama atol sa pagbisita sa mayor sa CCMC nga gisugdan og tukod atol sa iyang ikaduhang termino pagka mayor niadtong tuig 2015.

“We are executing the third and fourth floors. All architectural para magamit na by October 28,” padayag ni Sicat.

Ang Department of Engineering and Public Works (DEPW) pinaagi ni Assistant City Engineer Lowell Corminal dihang gipangutana ni Rama, nipabor sa paghuman sa 3rd ug 4th floor inay sa dugang tulo ka mga andana sanglit makabenepisyo dayon ang katawhan sa CCMC.

Mao sab kini ang baruganan ni Dr. Mary Jean Loreche, consultant ni Rama sa public health, sanglit mapalapdan pa sa CCMC ang ilang serbisyo sa dialysis center, operating room ug ubang mga departamento.

Matod pa ni Sicat nga dili nila makumpleto ang unang saad ngadto ni Rama nga mahuman ang structure hangtod sa 10 ka andana sa iyang adlaw nga natawhan karong Oktubre 28 sanglit sa ilang pasiuna nga pagsusi, adunay silay nakitang problema.

“Unfortunately kasi when we were doing our engineering study, we realized that the columns are not into direct alignment and thats really a cause of concern for the City,” dugang ni Sicat.

Gipadayag ni Sicat nga aron walay bias, adunay third party nga mohimo sa makuti nga pagtuon ug kon masuta nga wala maapektohi ang structural integrity ug dili na sila mohimo og retrofittings, mahuman ang structural sa ika-8 hangtod ika-10 nga andana karong Enero 2023.

Ang mayor nibutyag nga himuon niyang kada semana ang pagbisita sa CCMC aron makita ang kalamboan sa trabaho nga kinahanglan humanon sa ika-68 nga birthday ni Rama karong Oktubre 28.

Si Rama nipadayag nga kon dili matuman sa ME Sicat Construction ang ilang saad, posible nga iyang ipaputol ang kontrata. /