DOH milusad sa ‘PinasLakas Program’ sa siyudad sa Naga

Subay sa pagsanong sa panawagan sa Presidente sa nasud kalabot sa padayong pagpamakuna aron maprotehian sa epekto sa coronavirus disease 2019 (Covid-19) ang publiko, labina sa pagbalik sa face-toface classes, pormal nga gilusad sa Department of Health (DOH) ang ‘PinasLakas Program’ sa dakbayan sa Naga sa Hulyo 26, 2022.

Ang dakbayan maoy napili nga mo-host sa regional launch nga gipahigayon sa Pasilong sa Naga.

Kini subay sa tinguha nga motaas ang vaccination rate sa eligible population ilabi na sa mga senior citizen nga labing vulnerable o daling mataptan sa bisan unsang sakit.

Una nang gipahibawo sa DOH nga target nilang makabakuna og 90 porsyento sa mga senior citizen (A2 population) samtang makatusok sa booster shots sa 50 porsyento sa target population sulod sa unang 100 ka adlaw sa bagong administrasyon.

Sa wala pa ang launching, una na nga gitigom ni Naga City Mayor Val Chiong ang tanang punong barangay ilabi na ang Barangay Health Workers, mga pangu sa senior citizens federation ug purok federation aron suportahan ang pagpatuman sa Pinaslakas campaign sa DOH-7 ubos sa administration ni Presidente Ferdinand “Bongbong” Marcos Jr.

Ang programa gitapos sa paglagda sa panaad sa tanang stakeholders ug mga sakop sa kagamhanan.

Gisunod niini ang pagpadayon sa vaccination sa Vicente Mendiola Center for Health ug Pasilong sa Naga.