SJVA sa Carbon pirmahan na ni Rama, Megawide

Ang Cebu City Government ug Megawide Construction Corporation (MCC) mopirma na sa supplemental joint venture agreement (SJVA) karong weekend alang sa Carbon Market Modernization.

Si Mayor Michael Rama nagkanayon nga usa sa labing dako nga curative measure nga iyang gipausab sa karaan nga JVA nga gipirmahan ni kanhi mayor Edgardo Labella niadtong 2020 mao ang paghatag sa annual share sa Siyudad ug ang pagdugang og puhonan sa investor.

Ang gipasabot ni Rama mao ang P50 milyones matag tuig nga base sa inisyal nga kasayoran nga nasulod sa SJVA, mohatag dayon og P50 milyones ang MCC atol sa ilang pagpirma.

Laing provision mao nga inay P5.5 bilyones nga capital ang ibubo sa MCC, himuon nang P8 bilyones para pagpalambo sa Carbon market ug pagpalambo sa 2,000-square meter nga Freedom Park.

Sa karaang JVA nga napirmahan ni Labella ug executive director for infrastructure sa MCC nga si Manuel Louie Ferrer, magsugod og dawat sa tinuig nga share ang City Government sa 2024 pa unta, ang panahon nga mahuman na ang construction sa bag-ong merkado nga mahimutang sa Warwick Barracks ug Freedom Park.

Sa kasamtangan, ang mga stall nga ginama sa light materials sa Warwick ug Freedom Park gihawanan na sa Cebu City nga maoy unang lakang alang sa construction sa bag-o ug modernong pampublikong merkado sa dakbayan.

Ang gatusan ka vendors nga nagbase sa maong lugar sulod na sa pipila ka mga dekada, temporaryo unang gibalhin sa interim market, ang kanhi Unit-II building nga gigastohan og gatusan ka milyon ka pesos sa MCC aron mahimong hamugaway ang ilang pagpaninda samtang sila nagpaabot nga mobarog ang bag-ong merkado.

Sa miaging semana gisugdan ang paghawan sa mga dapit nga barugan sa bag-ong edipisyo.

Ang pagsugod sa pagtukod sa bag-ong merkado sugdan unta sa miaging tuig, apan nalangay tungod sa pagdumili sa mga manindahay bisan kon nahuman na ang pag-andam sa interim market.

Makadaghan na ang Siyudad nihatag og tagal kanila apan way nilihok.

Kadaghanan sa vendors nga supak sa pagbalhin nangabalaka nga mominos na ang ilang mga halin kon mobiya sila sa karaang pwesto.

/ AMPER CAMPAÑA GIKORAL: Ang Freedom Park nga sa daghang mga dekada giukopar sa mga manindahay sa merkado publiko sa Carbon gikoral na human kini nahawanan ug gipabalhin sila sa interim market sa Unit 2. Karong tapos sa semana, sila si Mayor Michael Rama ug mga opisyal sa Megawide Construction Corp. magpirmahay alang sa supplemental joint venture agreement.