64 anyos nanunggab, mitahan

Usa ka 64 anyos nga lolo nga nakadunggab sa iyang silingan sa Brgy. Bas Dako, lungsod sa Loon, Probinsiya sa Bohol nitahan sa kapulisan niadtong Martes sa gabii, Hulyo 26, 2022.

Si Police Staff Sergeant Joseph Vincent Arocha sa Loon Police Station Station niila sa suspek nga si Adriano Petos, lumolupyo sa barangay.

Ang biktima giila sa kapulisan nga si Roel Bajade, kinsa nitabang og luto sa pagkaon sa kumbira sa adlaw nga natawhan sa ilang silingan.

Ang biktima nga nakainom nigawas aron mangihi, apan giingong daghan ang iyang gipang-istorya batok sa suspek nga diha usab sa gawas nakadungog hangtod nga gidunggab.

Sa pag-abot sa kapulisan sa lugar nga nahitaboan, dali nga niduol ang suspek nga si Petos aron pagtahan.

Matod ni Arocha, kasong attempted murder ang atubangon ni Petos.