ROTC ibalik, apan ayaw dalia

Gusto ni Presidente Ferdinand Marcos Jr. nga ibalik ang Reserve Officers’ Training Corps (ROTC) alang sa senior high school nga mga tinun-an. Ang ROTC, sa nanglabay nga katuigan, gihimo na lang nga optional kay kadaghanan mipili sa National Service Training Program (NSTP). Apan sa panahon sa pandemic, naundang sab ni.

Way dautan sa programa sa ROTC. Kon duna may nahitabo nga mga hazing, maisip kining isolated cases. Apan malampuson ba ang programa dihang kini gipatuman pa? Mao kini ang angay nga tun-an pag-ayo aron ang mga kakuwangan kaniadto di na masubli karon. Sama sa paglikay nga mahitabo ang hazing sa mga kadete.

Basic unta kaayo sa military training mao ang pagkat-on sa paggamit og pusil, compass ug map reading ug pagtudlo og first aid, survival skills ug rescue. Apan wa kini matudlo sa pagtarong tungod sa kakuwang sa mga instructor ug mga galamiton.

Pananglitan, bisan gani sa paggamit ug pagpabuto og armas, maihap lang sa mga tinun-an ang nakat-on. Sagad, kadto lang mga opisyal sa ROTC, apan ang ordinaryong mga kadete, igo lang sa pag martsa, pagpas-an og pusilpusil kay kahoy man ang kadaghanan nga gigamit sa mga Sunday formation.

Di lang kay paghigugma sa nasod ug disiplina ang tumong sa military training kon di, ang pagtudlo sa mga tinun-an sa mga basic nga gimbuhaton sa usa ka sundawo kay kini sila magamit panahon sa gubat.

Usik kaayo sa panahon kon ang makat-onan lang sa mga kadete mao ang martsa ug rifle exhibition execution. Bisan gani map reading naglisod pa sa pagkat-on.

Busa, importante kaayo nga sa di pa ipatuman og balik ang compulsory nga ROTC, kinahanglan nga dunay assessment nga pagahimuon. Di kini dali-dalion aron ang sangkoan sa programa mao ang lig-on nga reserve force nga magamit sa nasod panahon sa mga emerhensiya, di lang sa gubat.