Hidilyn, Julius gikasal na
Nagminyo na sila Olympian weightlifter Hidilyn Diaz ug Julius Naranjo niadtong Martes, Hulyo 26, 2022 sa Baguio City.
Nagbinayloay og “I do’s” ang duha atol sa labing unang anibersaryo sa makasaysayong paglangkat ni Diaz og gold medal sa Olympics, nga maoy labing unang bulawan nga natagamtam sa Pilipinas sa matag upat ka mga tuig nga kompetisyon.
Mabihagon ang pamay-ong ni Diaz sul-ob ang pangkasal nga senina nga ginama ni Francis Libiran. Sama sa iyang naandang gimbuhaton una siya moalsa og barbel, niginhawa og lawom si Diaz una kini nipaso sulod sa simbahan dungan sa pagkanta ni Regine Velazquez sa kantang “Ikaw.”
Basi sa wedding invitations, lakip sa principal sponsors mao sila si kanhi Vice President Leni Robredo, boxing legend Manny Pacquiao, ug business tycoons Manny Pangilinan, Ramon Ang, ug Teresita Sy-Coson.
Principal sponsors sab sila si Philippine Olympic Committee (POC) President Bambol Tolentino, Philippine Basketball Association (PBA) Chairman Ricky Vargas. celebrity doctor Vicki Velo, motivational speaker Bo Sanchez, ug ang aktres nga si Judy Ann Santos.
Daghan pa nga prominenteng mga personalidad ang naa sa kalihukan.