Williams mipirma na’g bag-ong kontrata

Nagkasinabot na si Mikey Williams ug ang Talk N’ Text (TNT) Tropang Giga niadtong Hulyo 26, 2022 alang sa bag-ong kontrata sa dekalidad nga Fil-Am nga basketbolista.

Mipirma si Williams og bagong tulo ka mga tuig sa samang prankisa nga nagpili kaniya isip No. 4 overall pick niadtong 2020.

Ning maong kalambuan, nakadayeg si TNT coach Chot Reyes sa bag-ong manager sa Tropang Giga nga si Jojo Lastimosa sa pagkumbinsir kang Williams nga magpabilin sa team.

“I’m glad this is finally done,” matod ni Reyes nga napatik sa Spin.ph. “Although I know they’ve agreed on major issues already, to have Mikey finally sign for 3 more years is a testament on manager Jolas’ patience and Mikey’s desire to stick with TNT over the long term.”

Sa sayo pa, si Reyes maoy gitahasan sa pagsulbad sa isyu kabahin ni Williams apan iya kining gipasa ngadto kang Lastimosa dihang natudlo kini nga bag-ong manager sa team.

Si Williams nakapalta sa nag-unang lima ka mga duwa sa Tropang Giga sa Philippine Basketball Association (PBA) 2022 Philippine Cup gumikan sa isyu sa kontrata.

Gikan sa iyang pagbalik og duwa, si Williams mirehistro og 21.7 puntos nga average, 5.1 rebounds, ug 3.8 assists, mga numero nga dili sayon tapakan sa Tropang Giga.

/ TIEBREAKERTIMES ■ SEMIS: Nagpakatap og 26 puntos si Mikey Williams aron agakon ang TNT Tropang Giga sa yanong kadaugan batok sa Converge FiberXers sa ilang quarterfinal game kagahapon, Hulyo 27, 2022, sa PBA Philippine Cup. Sa kadaugan, naangkon sa Tropang Giga ang unang lingkuranan sa semis.