TNT SULOD SA SEMIS

Yanong gipangdispatsar sa Talk N’ Text (TNT) Tropang Giga ang Converge FiberXers, 116-95, kagahapon, Hulyo 26, 2022, sa ilang

quarter-final game sa 2022 Philippine Basketball Association (PBA) Philippine Cup sa Smart Araneta Coliseum sa Manila.

Sa kadaugan, naangkon sa Tropang Giga ang labing unang lingkuranan sa semi-finals best-of-five series.

Gimugna ni Fil-Am Mikey Williams sa 2nd quarter ang 22 sa iyang kinatibuk-ang 26 puntos nga maoy nagdugkat sa pagsutoy sa opensa sa Tropang Giga paingon sa hingpit nga dominasyon.

Sa 2nd quarter, 40 puntos ang namugna sa Tropang Giga nga maoy hinungdan nga ningburot og maayo ang ilang labaw ngadto sa 70-42 sa halftime.

Human niini, wala na kaayo ibabad sa Tropang Giga si Williams ug kontrolado na nila ang duwa hangtod na sa katapusang gutlo.

Si Troy Rosario nidugang og 18 puntos alang sa Tropang Giga, niamot og 16 puntos ang Sugboanong si Roger Pogoy samtang nitampo og 15 puntos ang beteranong si Jayson Castro.

Sa semi-finals, ang makontra sa Tropang Giga mao ang modaog sa laing quarter-final nga engkuwentro tali sa Magnolia Chicken Timplados Hotshots ug NLEX Road Warriors.