100 ka residente sa Kalunasan nagwelga
Nagwelga ang dul-an 100 ka mga molupyo sa Barangay Kalunasan, dakbayan sa Sugbo kagahapon, Hulyo 28, 2022, human gialihan og tubo ang ilang agianan sa Old Philippine Railway Residents Association (OPPRA) Inc.
Gusto sa mga residente nga kuhaon ang giatang nga tubo nga sama sa “toll gate” sa mga pribadong parking area nga nagkolekta og bayad gikan sa mga motorista.
Ang mga residente nga gitabangan ni Engr. Antonio Canoy, kinsa apil sa apektado, nagkanayon nga sama sila sa usa ka piniriso sanglit dili na sila makasayonsayon og agi labi na kadtong adunay motor ug sakyanan.
Ang mga nagwelga nagdala og placards nga dunay nakasulat, “Itangtang ang koral”, “Ibagsak ang koral”, “Koral ay itapon”, “Abli ang koral”, “Ablihi ang koral lisod kaayo og naay emergency” ug “Para sa among kagawasan”.
Kagahapon, ang kadena nga adunay kandado giguba sa mga nagwelga ug nalibkas ang “toll gate” paibabaw apan temporaryo ra usab kining gibalik pinaagi sa paghigot og pisi.
Sa ilang bahin, ang chairman sa OPPRA Inc. nga si Roy Pintor nagkanayon nga ilang gibutangan og koral sanglit gusto nila nga ibalik ang plaza nga ilang gamit kaniadto.
Si Pintor nialegar nga namayad si Canoy para adunay magwelga apan hugot kining gisalikway sa nauwahi.
Ang lote nga ilang gipuy-an gipanag-iya sa Cebu Provincial Government nga nagsilbing relocation site sa kanhi mga nagpuyo sa old railway kinsa naghimo og organisasyon nga gitawag og OPPRA Inc.
Ang ilang asosasyon nga gipangulohan ni Pintor andam makigdayalogo tali sa mga residente nga gipangulohan ni Canoy.