Drayber sa motorsiklo naligsan sa dump truck sa Mandaue, patay

Patay ang drayber sa motorsiklo human naligsan og dump truck sa dalan Plaridel duol sa Cansaga Bay Bridge sa Barangay Paknaan, dakbayan sa Mandaue, kagahapon sa kaadlawon, Hulyo 28, 2022.

Ang biktima giila sa kapulisan nga si Teodoro AnamAnam, 28, molupyo sa Barangay Tayud, lungsod sa Consolacion.

Ang drayber sa dumptruck mao si Raul Ferrater, 42, taga Catarman, lungsod sa Liloan.

Sumala ni Police Master Sergeant Rolando Gelido sa Traffic Enforcement Unit (TEU) sa Mandaue, ang motorsiklo ug trak parehong nagpadulong sa usa ka direksiyon ngadto sa Barangay Tayud.

Matod ni Gelido, si AnamAnam ni-overtake sa wala nga bahin sa dumptruck apan naigo niini ang plastic barrier sa tunga sa dan.

Kini ang hinungdan nga natumba ang motorsiklo samtang si Anam-anam naligsan sa trak, apan ang motorsiklo walay dakong kadaut, dugang ni Gelido.

Si Police Master Sergeant Richard Suycano, hepe sa TEU, nagkanayon nga ang maong dalan ubos sa pag-ayo sa Department of Public Works and Highways (DPWH) hinungdan nga dunay plastic barrier o babag sa tunga nga bahin sa dan.

Sa interview sa reporters, si Ferrater niingon nga wala siya nakabantay sa presensiya ni Anam-Anam hangtod nga nakadungog siya og dakong lagapak sa dan ug ang iyang

helper nisusi dayon kon unsay ilang naigo.

Dugang sa drayber, nakurat sila sa pagkakita sa lawas sa biktima nga diha sa ubos nga patay na.

Si Ferrater kasamtangang gitanggong sa TEU samtang nagpaabot sa aksiyon sa pamilya sa biktima ug mag-atubang kini og kasong reckless imprudence resulting in death and damage to property kon

dili magkasinabot.