Ikatulo nga drug den nabungkag sa PDEA 7 sa Cebu City

Ikatulong drug den sa dakbayan sa Sugbo nabungkag sa Philippine Drug Enforcement Agency (PDEA) 7 Cebu Provincial Unit ug kapulisan atol sa laing buy-bust sa Martes sa alas 9 sa gabii, Hulyo 27, sa Barangay

Carreta, dakbayan sa Sugbo.

Lima ka mga tawo ang nadakpan, apil ang drug den maintainer.

Ang nasikop giilang sila si Jimboy Peñas, alyas Wilmar, 25, drug maintainer ug giingong mamaligyaay og illegal drugs sa dapit nga si Elniño Rosal, 20, engraver.

Lakip sa nasikop mao ang mga parokyano nga sila si Alfonso Pera, 37; John Paul Sambrano, 26; ug Alladin Villegas, 44.

Nasakmit gikan kanila ang kinatibuk-ang 10 gramos sa gituohang shabu nga dunay street drug price nga P74,800.

Nianang buntag sa samang adlaw, ang PDEA nakabungkag og duha ka mga drug den ug nakasikop og 15 ka gikatahapang mga durugista.

Unang girumbo nila ang drug den sa Sitio Lower Yati, Barangay Quiot Pardo ug pipila ka oras ang milabay, laing drug den ang ilang gironda sa Barangay Tisa.

Matod sa PDEA 7, ang pagbungkag sa drug dens usa sa ilang gitutokan karon sa kampanya batok sa drugas kay kini tinubdan sa illegal drugs ug nagtukmod sa mga krimen sa komunidad.