5 ka trak naghugawhugaw sa dalan sa Talisay gipangdakop
Gipangdakop ang lima ka mga dagkong trak de karga nga naghakot og anapog, bas ug yuta nga nagtagaktagak sa dan sa dakbayan sa Talisay.
Si Jonathan Tumulak, hepe sa City of Talisay Traffic Operations and Development Authority (CT-TODA), nagkanayon nga nahugaw ang dan tungod sa nangatagak nga karga gikan sa trak hinungdan nga nihimo sila og operasyon sa pagpanakop sa Miyerkules sa gabii, Hulyo 27, hangtod sa Huwebes sa kaadlawon, Hulyo 28, 2022.
Apan, matod ni Tumulak, ang mga personnel sa CT-TODA giharas sa usa ka tawo nga niangkong tag-iya sa usa sa mga trak nga gidakop.
Si Tumulak nidugang nga usa ka drayber sa usa ka trak nga ilang gidakop nitawag sa ilang giila nga amo ug maoy niharas sa iyang mga sakop.
“Bisan paman niana wala kami mahadlok. Ang akong awhag lang sa maong tawo nga mas maayo mobisita siya sa among opisina aron ipasabot sa iyaha kon nganong gidakop ang iyang trak,” matod ni Tumulak.
Dugang ni Tumulak ang gibuhat sa lalaki wa nakapaluya ug nakapahadlok kanila tungod kay sila nihimo lang sa trabaho alang sa kaluwasan sa tanan.
Ang gihimo sa lalaki nakaaghat na hinuon kanila nga mohimo pa sa daghang mga operasyon aron di na maghugawhugaw sa karsada.
Iya nang giduso ang panghitabo ngadto sa legal department kon unsa man ang ilang mahimo sa tawo nga nangharas sa mga sakop sa CT-TODA.
Matud ni Tumulak, ilang gihimo ang operasyon gumikan kay halos kada gabii adunay maghugawhugaw sa karsada. Gawas niini, kuyaw sa mga motorista.
Nahitabo na hinuon nga ang mga enforcer maoy magsunod sa pagpanglimpyo aron way motorista nga madisgrasya.